Viðræður við ESB hafa kostað 900 milljónir

Kostnaður íslenska ríkisins vegna aðildarviðræðna við ESB nemur tæplega 900 milljónum króna. Óvíst er hvaða tilgangi ný skýrsla um stöðu viðræðna þjónar þar sem þegar liggur fyrir ítarleg skýrsla utanríkisráðuneytisins.

Samkvæmt stjórnarsáttmála ætlar ríkisstjórnin að gera hlé á viðræðum við ESB og gera skýrslu um stöðu viðræðna og stöðu innan sambandsins sjálfs.

Það er athyglisvert að ríkisstjórnin telji það mikilvægt að gera þurfi sérstaka skýrslu um stöðu aðildarviðræðna því í apríl síðastliðnum kom út 76 bls. löng skýrsla á vegum utanríkisráðuneytis sem útlistar nákvæmlega aðildarferlið til þessa, hver nákvæmlega staðan er og hvað sé eftir.

Það er farið að sjá til lands í aðildarviðræðunum og það er búið að eyða miklum peningum í þær.

Beinn kostnaður Íslands vegna þeirra nemur tæplega 301 milljón króna. Þá nemur kostnaður íslenska ríkisins í fjárlögum vegna þýðinga á árunum 2010-2012 590 milljónum króna. Þetta eru samtals 891 milljón króna sem greitt hefur verið úr ríkissjóði vegna viðræðnanna.

Í desember 2011 fékk Ísland styrk frá ESB vegna þýðinga sem nemur jafnvirði 730 milljóna króna en það eru þýðingar frá og með árinu 2012.

Þá er viðræðum lokið í 11 köflum, viðræður standa yfir í 16, áður en gert var hlé á þeim og samningsafstaða liggur fyrir í tveimur til viðbótar. Það er aðeins í 4 köflum sem samningsafstaða liggur ekki fyrir, en það eru m.a erfiðustu kaflarnir. Um sjávarútveg og landbúnað.

Ríkisstjórnin hefur ekki gefið það út hvenær það verður þjóðaratkvæðagreiðsla um áframhald aðildarviðræðna. Velta má fyrir sér hvort skýrslan sem kynnt verður þinginu þjóni þeim eina tilgangi að tefja málið, enda liggja fyrir allar upplýsingar um stöðu viðræðnanna og stöðuna innan sambandsins.