Hafna því að pakka innfluttum kjúklingi

Þrjú fyrirtæki sem slátra og pakka kjúklingi hafna þeirri fullyrðingu Ásmundar Friðrikssonar alþingismanns, að þau þíði, vinni og pakki erlendum kjúklingi í umbúðir fyrirtækisins.

Neytendasamtökin sendu fyrir spurnir til fyrirtækjanna Reykjagarðs, Ísfugls og Matfugls. Öll fyrirtækin neita ásökuninni í svörum sínum.

„Í svari Reykjagarðs kemur m.a. fram að slík vinnubrögð væru vörusvik rétt eins og Neytendasamtökin hafa einnig bent á og að Reykjagarður tæki aldrei þátt í slíku. Í svari Ísfugls segir m.a. að „Ísfugl selji aðeins úrvals íslenskt hráefni”. Í svari Matfugls kemur m.a. fram að „Matfugl hefur aldrei flutt inn erlendan kjúkling sem pakkað er í neytendapakkningar og selt sem íslenskan kjúkling”,“ segir í tilkynningu Neytendasamtakanna.*

Einnig kemur fram í svörum forráðamanna Holtakjúklings og Matfugls að vörur þeirra verði merktar með upprunalandi, Íslandi, í framtíðinni.

Tekið er fram að Matvælastofnun hafi eftirlit með fyrirtækjunum svo hægt sé að rekja öll vandamál sem upp komi í framleiðslu, til viðkomandi kjúklingaframleiðenda.

„Það hefði því verið eðlilegt að viðkomandi þingmaður hefði leitað sér betri upplýsinga hjá Matvælastofnun áður en hann fór með málið í ræðustól Alþingis.“

Að endingu er tekið fram tilkynningunni að bannað sé að selja innfluttan kjúkling í verslunum hér á landi nema hann sé frosinn eða steiktur.

„Því miður eru hinsvegar engar reglur um að upprunaland skuli koma fram við sölu á kjúklingum fremur en öðru kjöti. Þetta hafa Neytendasamtökin ítrekað gagnrýnt enda sé um að ræða mikilvægar upplýsingar fyrir neytendur til að tryggja að þeir geti valið á upplýstan hátt.“