Sjálfstæðismenn samþykktu að halda prófkjör

Sjálfstæðismenn í Reykjavík munu velja frambjóðendur sína fyrir borgarstjórnarkosningarnar næsta vor með almennu prófkjöri sem fram fer 16. nóvember næstkomandi. Þetta var ákveðið á fundi sem Vörður, fulltrúaráð sjálfstæðismanna í Reykjavík, stóð fyrir í Valhöll í kvöld.

Það var þétt setið í Valhöll í kvöld. Kosið var um tillögu Varðar um að almennt prófkjör yrði haldið í nóvember og var það samþykkt. Horfið var frá þeim hugmyndum að halda leiðtogaprófkjör eins og stefnt var upphaflega að í stjórn Varðar. Mikil andstaða var við að raðað yrði á lista Sjálfstæðismanna með leiðtogaprófkjöri og því varð úr að lögð var fram tillaga um að almennt prófkjör færi fram. Sú tillaga var samþykkt með miklum meirihluta greiddra atkvæða

Aðeins fullgildir meðlimir Sjálfstæðisflokkins í Reykjavík munu geta tekið þátt í prófkjörinu í nóvember.