Telur hægt að selja farþegum skemmtiferðaskipa meira

„Við teljum að þetta geti skapað góðar tekjur og mikla vinnu fyrir þá aðila sem að þessu koma,“ segir Einar Þ. Einarsson hjá Icecard í bréfi til Faxaflóahafna þar sem óskað er eftir aðstöðu fyrir sölutjöld á Skarfabakka.

Hugmynd Einars er sú að sett verði upp tvö samtals fimm hundruð fermetra sölutjöld við hlið núverandi þjónustuhúss fyrir ferðamenn á Skarfabakka. Ætlunin sé að bjóða upp á íslenskar vörur; handverk, listmuni og annað á þeim tímum sem skemmtiferðaskip leggi að bryggju. Fyrirtæki og einstaklingar geti leigt þar bása.

„Við gerum ráð fyrir í fyrstu að um fjörutíu aðilar verði með söluaðstöðu og að hver hafi um tíu fermetra sölupláss,“ segir Einar í bréfi sínu.

 

Taka ekkert frá miðbænum

Einar bendir á að farþegar skemmtiferðaskipa staldri oftast afar stutt við, oft ekki nema níu til tólf klukkutíma. Margir þeirra velji að fara í skoðunarferðir til að sjá það sem landið hafi upp á bjóða og hafi því ekki tíma til að fara líka í verslunarleiðangur í miðborginni. Þetta fólk hafi hins vegar áhuga á að kaupa minjagripi og sölutjöld við skipshlið gætu mætt því.

Að sögn Einar yrði um hreina viðbót að ræða í sölu varnings til þeirra sem í skipunum eru. Ekki sé verið að taka frá verslun í miðborginni. „Þvert á móti,“ segir Einar í bréfinu. „Hér er um aðstöðu [að ræða] sem öllum stendur til boða sem selja íslenskar vörur.“

Hættur við fríhöfn við skipshlið

Erlend skemmtiferðaskip sem hafa viðkomu í Reykjavík leggja flest að Skarfabakka í Sundahöfn. Einar hefur áður óskað eftir að koma þar upp fríhöfn fyrir farþega skipanna, á líkan hátt og gerist í flughöfnum í millilandaflugi. Hafnaryfirvöld sáu þessari hugmynd margt til fyrirstöðu og er Einar nú fallinn frá henni.

„Söluaðilar munu selja sína vörur eins og á öðrum stöðum, það er taxfree gegn brottfararspjaldi, er útskýrt í bréfi Einars sem kynnt var á síðasta fundi stjórnar Faxaflóahafna og rætt verður á næsta fundi stjórnarinnar.