Átján virkjanakostir sem gætu færst í nýtingarflokk

Búast má við að allt að átján virkjanakostir verði færðir úr verndar- og biðflokki, og ýmist yfir í nýtingarflokk eða biðflokk, vegna stefnumörkunar nýrrar ríkisstjórnar um að endurskoða rammaáætlun. Mörg átakamál gætu blossað upp á ný, eins og um Norðlingaölduveitu, Bitruvirkjun og Gjástykki.

Í fáum málaflokkum verður jafn afgerandi stefnubreyting með stjórnarskiptunum eins og í afstöðu til virkjana. Formenn stjórnarflokkanna, þeir Sigmundur Davíð Gunnlaugsson og Bjarni Benediktsson, kváðu afdráttarlaust á um það á blaðamannafundinum á Laugarvatni í fyrradag, þegar stjórnarsáttmálinn var kynntur, að Íslendingar ættu óhikað að stefna að aukinni nýtingu sjálfbærra orkulinda. Sigmundur Davíð sagði orkuframleiðslu Íslendinga einhverja þá umhverfisvænustu í heimi og Bjarni sagði að menn þyrftu ekkert að skammast sín fyrir það sem gert hefði verið í orkuuppbyggingu á Íslandi.

Samorka, samtök orkufyrirtækja, tiltók í fyrra þær virkjanir sem hún taldi saltaðar á pólitískum forsendum. Niðurstaða þeirra var átján virkjanir:

Á Reykjanesi jarðvarmavirkjanir í Trölladyngju, Brennisteinsfjöllum og Austurengjum. Á Hengilssvæðinu virkjanir í Innstadal, Þverárdal, Grændal og Bitru. Vatnsaflsvirkjanir sunnan jökla, sem búast má við að lendi í endurskoðun, eru: Í neðri Þjórsá; Hvamms-, Holta-, og Urriðafossvirkjun, Bláfellsvirkjun í Hvítá, Norðlingaölduveita, Skrokkölduvirkjun, Tungnaárlón, Bjallavirkjun og loks jarðvarmavirkjun við Hágöngur. Norðan heiða voru Skatastaðavirkjun í Skagafirði og Gjástykki í Þingeyjarsýslum skilgreind af hálfu Samorku sem pólitísk flokkun.

Endurskoðun rammaáætlunar þarf þó ekki að þýða að allar þessar virkjanir verði leyfðar. Bjarni Benediktsson segir að eflaust gætu einhverjir virkjanakostir ekki lent í nýtingarflokki sem sumir vildu sjá þar. Aðalatriðið sé að ferlið verði tekið úr þeim pólitíska farvegi sem málið var sett í.