Hinn fertugi Dean Martin byrjar í fyrsta sinn í sumar

Þorvaldur Örlygsson, þjálfari ÍA, setti Dean Edward Martin í byrjunarlið ÍA fyrir leik á móti Þór Akureyri sem hefst á Akranesvelli klukkan sex. Þetta er fyrsti leikurinn í 10. umferð Pepsi-deildar karla í fótbolta.

Dean Edward Martin hefur ekki fengið að byrja inn á í fyrstu níu umferðunum en hann kom inn á sem varamaður í fyrsta leiknum eftir að Þorvaldur tók við Skagaliðinu.

Fyrir leikinn í kvöld var Dean Martin aðeins búinn að vera inn á vellinum í 40 mínútur í Pepsi-deildinni í sumar þar af spilaði hann aðeins í tíu mínútur á meðan Þórður Þórðarson var þjálfari Akranesliðsins.

Dean Edward Martin fór á kostum með ÍA í fyrrasumar þar sem að hann skoraði 4 mörk í 19 leikjum þar á meðal eitt þeirra eftir að hann hélt upp á fertugsafmælið.

Dean Martin er fæddur 31. ágúst 1972 og fagnar því 41 árs afmæli sínu seinna í sumar.

Þetta er ekki í fyrsta sinn sem Martin spilar fyrir Þorvald því þeir voru einnig saman þegar Þorvaldur hóf þjálfaraferil sinn hjá KA í upphafi aldarinnar.