Titringur í Stórþinginu vegna olíuleitar með Íslendingum

Titrings gætir í norskum stjórnmálum vegna umræðu innan norsku ríkisstjórnarinnar um frekari þátttöku í olíuleit á Drekasvæðinu. Þingmaður Kristilega þjóðarflokksins segir að það yrði undarlegt, í ljósi samstarfssáttmála nýrrar ríkisstjórnar, ef norsk stjórnvöld tækju þátt í olíuleit með Íslendingum á Jan Mayen-svæðinu.

Þótt flokkarnir tveir í minnihlutastjórn Ernu Solberg, Hægri og Framfaraflokkurinn, styðji báðir olíuleit við Jan Mayen, neyddust þeir við stjórnarmyndun í síðasta mánuði til að fallast á kröfu tveggja smáflokka, um bann við opnun nýrra svæða, til að tryggja sér stuðning þeirra á Stórþinginu.

Annar þessara flokka er Kristilegi þjóðarflokkurinn. Fulltrúi flokksins í orku- og umhverfisnefnd Stórþingsins, Rigmor Andersen Eide, segir að flokkurinn leggist gegn olíustarfsemi bæði á íslenska og norska hluta Jan Mayen-svæðisins. Hún viðurkennir þó að ríkisstjórnin brjóti ekki samstarfssáttmálann ef hún samþykkir að taka þátt í olíuleit Íslandsmegin.

„Við höfum ekkert að segja um hvað Ísland ákveður með Kína eða öðrum. En ef norska ríkisstjórnin fer inn og segir já við þessu, þá verðum við dálítið undrandi, út frá samstarfssáttmálanum sem við höfum á milli okkar,“ segir hún í viðtali við NTB-fréttastofuna, sem meðal annars NRK, norska ríkisútvarpið, hefur birt.

„Við tengjumst norska hlutanum, um hann getum við rætt. En ég furða mig á ef menn ætla að fara inn Íslandsmegin og fjárfesta þar,“ segir Rigmor Eide.

Tord Lien, olíu- og orkumálaráðherra Noregs, lagði áherslu á það í viðtali við norska fjölmiðla í síðustu viku að ekkert í samstarfssáttmálanum fjallaði um norska þátttöku á íslenska landgrunninu. Þátttaka Noregs myndi ráðast af því hversu mikla peninga norska ríkið gæti grætt á verkefninu.

Leiðtogi Náttúruverndarsamtaka Noregs, Lars Haltbrekken, segir að það myndi grafa undan samstarfssáttmálanum ef hægristjórnin færi inn í slíkt olíusamstarf við Jan Mayen. Hann heldur því fram að sáttmálinn takmarkist ekki við norskt yfirráðasvæði við Jan Mayen. Það sé hæpið að nota það sem afsökun að verkefnið sé Íslandsmegin á Jan Mayen-svæðinu.

„Ef það stendur í samstarfssáttmála að Noregur eigi ekki að bora eftir olíu við Jan Mayen hlýtur það einnig að gilda þótt það sé innan íslenskrar lögsögu,“ segir Lars Haltbrekken. Hann óttast að olíustarfsemi Íslandsmegin auki þrýsting á að einnig verði byrjað Noregsmegin eftir fjögur ár.