Vilja að norska ríkisstjórnin dragi sig út úr Drekaleyfum

Kristján Már Unnarsson skrifar 4. október 2013 19:09

Orkumálastjóri afhendir fyrstu Drekaleyfin að viðstöddum ráðherrum olíumála Íslands og Noregs í Ráðherrabústaðnum í janúar.

Samskipti Íslands og Noregs gætu komist í uppnám á næstu vikum, í kringum fyrirhugaða útgáfu á þriðja Drekaleyfinu, eftir að smáflokkarnir tveir, sem hyggjast styðja hægri stjórn Ernu Solberg til valda, lýstu því yfir í dag að þeir stefndu að því að norsk stjórnvöld drægju sig út úr olíuleit á íslenska Drekasvæðinu. Ljóst er að slíkt yrði áfall fyrir olíuáform Íslendinga.

Það þótti veruleg traustsyfirlýsing við olíuleit Íslendinga þegar olíumálaráðherra Noregs, Ola Borten Moe, mætti í Ráðherrabústaðinn við Tjörnina í byrjun ársins til að innsigla 25% þátttöku norska ríkisins í fyrstu tveimur sérleyfunum á Drekasvæðinu.

Olíumálaráðherrann var á þeim tíma staðráðinn í að opna norska hluta Jan Mayen-svæðisins til olíuleitar með vorinu en frestaði því óvænt með þeirri skýringu að gefa þyrfti meira svigrúm til rannsókna. Norskir fjölmiðlar hafa hins vegar birt aðra skýringu; að SV, systurflokkur Vinstri grænna í Noregi, hafi hótað því að sprengja rauðgrænu ríkisstjórnina ef olíuboranir yrðu leyfðar við Jan Mayen.

Í fyrradag bárust svo þau óvæntu tíðindi, að vegna skilyrða tveggja smáflokka fyrir stuðningi við nýju hægri stjórnina, ætlaði hún ekki að hefja olíuleit á sínum hluta Jan Mayen-svæðisins. Sagði norska Aftenbladet í fyrirsögn að nýja ríkisstjórnin gæti þannig eyðilagt olíudrauma Íslands, sem myndi missa mikilvægan samstarfsaðila og verða af gríðarlegum tekjum ef ekkert yrði af olíuborunum.

Og í dag birti Aftenbladet svo þá frétt að Noregur muni hugsanlega draga sig út úr olíuleyfunum við Ísland eftir tvö ár. Smáflokkarnir tveir, Kristilegi þjóðarflokkurinn og Vinstri, ætli að vinna gegn olíuleit á Jan Mayen-svæðinu og það beggja vegna lögsögumarkanna.

Sérleyfin á íslenska Drekasvæðinu. Ný ríkisstjórn Noregs þarf að svara því á næstu vikum hvort hún nýti sér 25% þátttökurétt í 3ja sérleyfinu með CNOOC og Eykon Energy.

Það er í gegnum ríkisolíufélagið Petoro sem norska ríkið er þegar orðinn 25% aðili að tveimur sérleyfum á íslenska svæðinu. Síðar í þessum mánuði er hins vegar búist við því að Orkustofnun bjóði Noregi aðild að þriðja sérleyfinu, með kínverska ríkisolíufélaginu CNOOC og Eykon Energy. Norsk stjórnvöld fá þá einn mánuð til að svara og gæti afstaða til þess hvort Petoro komi þar líka inn með 25% aðild valdið pólitískum titringi, ekki aðeins innan nýrrar ríkisstjórnar Noregs heldur ekki síður milli Íslands og Noregs.

Tengdar fréttir

Norski olíumálaráðherrann kemur vegna Drekaleyfanna

Olíumálaráðherra Noregs kemur til Íslands í næstu viku, ásamt tíu manna sendinefnd, til að vera við athöfn þegar fyrstu olíuvinnsluleyfin í íslenskri lögsögu verða gefin út. Noregur er fimmta mesta olíuútflutningsríki jarðar, þar er olíuiðnaðurinn mikilvægasta atvinnugreinin, og embætti olíumálaráðherrans eitt það áhrifamesta í landinu.

28. desember 2012 18:44

Kínverjar leiða umsókn um 3ja leyfið á Drekasvæðinu

Kínverska ríkisolíufélagið CNOOC hefur óskað eftir að komast í olíuvinnslu á Drekasvæðinu. Ráðamenn Eykons segjast hafa átt frumkvæði að því að fá Kínverjana.

4. júní 2013 18:30

Stórþingið samþykkti einróma að leita olíu með Íslendingum

Norska Stórþingið samþykkti einróma þátttöku norska ríkisins í olíuleit og olíuvinnslu í lögsögu Íslands á Drekasvæðinu. Orkumálastjóri segir þetta með stærstu atburðum í olíumálum Íslendinga til þessa. Ríkisstjórn Noregs var áður búin að samþykkja fyrir sitt leyti á ríkisstjórnarfundi að norska ríkið nýtti sér ákvæði Jan Mayen-samkomulagsins um 25% þátttöku í sérleyfum á Drekasvæðinu.

19. desember 2012 18:35

Vonast til að olíuframleiðslan hefjist eftir 7-8 ár

Olíuframleiðsla á landgrunni Íslands gæti hafist eftir sjö til átta ár og fyrsti borpallurinn komið eftir þrjú til fjögur ár. Þetta segir forstjóri skoska olíufélagsins Faroe Petroleum, sem nú er orðinn rétthafi fyrsta olíuvinnsluleyfis í lögsögu Íslands. Olíumálaráðherra Noregs segir leyfisútgáfuna í dag sögulegan viðburð. Norski olíumálaráðherrann Ola Borten Moe mætti í Ráðherrabústaðinn klukkan níu í morgun ásamt fylgdarliði til fundar við Steingrím J. Sigfússon atvinnuvegaráðherra og áttu fulltrúar ríkjanna klukkustundarlangan fund áður en kom að stóru stundinni.

4. janúar 2013 18:37