Skipulagði tónleika í minningu ömmu sinnar

Tónleikar Project Lonewolf verða á Gamla Gauk á föstudagskvöld í tilefni af útgáfu plötunnar Expectations, Ideas and Emotions

„Ég skipulagði tónleikana sjálfur og fékk svo aðrar hljómsveitir í lið með mér," segir tónlistarmaðurinn Bjarni Freyr Pétursson sem einnig samdi alla tónlistina á plötunni einn síns liðs.

„Ég tileinka ömmu minni, sem dó úr krabbameini 2003, plötuna. Platan fjallar mikið um tilfinningar og ást og sorg og missi og allt svoleiðis. Amma var mikill dugnaðarforkur og ég leit mikið upp til hennar," segir Bjarni Freyr sem bætir því við að amma sín hafi verið mikil saumakona og gert allt sjálf. „Ég horfði svolítið mikið upp til þess og ákvað að gera líka allt sjálfur," segir Bjarni Freyr.

Aðspurður segir Bjarni Freyr að best sé að lýsa tónlistinni á plötunni sem melodísku þungarokki. „Þetta er svona blanda, ég er með róleg viðlög og söng og svo erum við með þessa hörðu kafla," segir hann.

Útgáfutónleikarnir eru sem fyrr segir á Gamla Gauknum á föstudag og opnar húsið klukkan 21. Hljómsveitirnar Noise og We Made God hita upp.