Vandi bæjarbúa endurspeglist í tölum um barnaverndartilvik

„Stærsti þátturinn er í rauninni bara ástandið í bænum, til dæmis hvað varðar atvinnu. Fjölskyldur eru í mjög erfiðri stöðu sem hefur ekki síst áhrif á andlega líðan,“ segir Hjördís Árnadóttir, félagsmálastjóri Reykjanesbæjar. „Það kemur meðal annars fram í þessu.“

Tilkynningum til barnaverndarnefndar Reykjanesbæjar fjölgaði um 50% fyrstu níu mánuði ársins miðað við sama tímabil í fyrra.

Barnaverndarstofa hefur birt samanburð á fjölda tilkynninga til barnaverndarnefnda. Fjöldi tilkynninga var 6.263 fyrstu níu mánuði ársins 2013, en 5.832 fyrir sama tímabil árið á undan. Þar kemur fram að tilkynningum fjölgaði um 7,4 prósent á landsvísu. Á höfuðborgarsvæðinu fjölgaði tilkynningum um þrjú prósent en á landsbyggðinni var fjölgunin 17%.

Þegar tölfræðin frá landsbyggðinni er greind sérstaklega kemur í ljós að fá sveitarfélög bera uppi fjölgunina hlutfallslega. Reykjanesbær sker sig úr með 493 tilkynningar en þær voru 330 á sama tímabili í fyrra. Fjölgunin er 50%, eins og áður sagði. Önnur sveitarfélög þar sem fjölgun er áberandi mikil eru Sandgerði og Akranes.

Íbúar Reykjanesbæjar eru um 14.200 talsins en átta prósent af heildarfjölda tilkynninga á landsvísu eru þar í bæ. Þegar hlutfall barnaverndarmála á hver þúsund börn er notað sem mælistika var landsmeðaltalið 54,6 börn, samkvæmt nýjustu tölum Barnaverndarstofu. Í Reykjanesbæ var hlutfallið hins vegar 80 börn.

Þegar tölfræði Barnaverndarstofu yfir landið í heild er skoðuð sést að flestar tilkynningar eru vegna vanrækslu, eða 2.307 talsins. Vegna ofbeldis voru tilkynningarnar 1.643 og vegna áhættuhegðunar 2.269.