Þrír milljarðar í stóriðju á Bakka

Ríkið mun leggja fram, yfir þrjá milljarða króna vegna stóriðju á Bakka og meiri skattaívilnanir en áður, samkvæmt frumvarpi sem Steingrímur J. Sigfússon atvinnuvegaráðherra mælti fyrir á Alþingi í gærkvöldi. Ráðherrann segir að ríkið verði búið að fá peningana til baka áður en framkvæmdum lýkur.

Núverandi ríksstjórn hafnaði því á fyrstu starfsmánuðum sínum að endurnýja viljayfirlýsingu við Alcoa um álver á Bakka, og mæltist til að fleiri kostir skyldu skoðaðir. Kísilverksmiðja komst á dagskrá og fyrir þremur árum sagði Katrín Júlíusdóttir þáverandi iðnaðarráðherra að Þingeyingar gætu farið að búa samfélagið undir stóra atvinnuuppbyggingu.

Til að greiða fyrir samningum við þýska félagið PCC um kísilver hefur atvinnuvegaráðherra nú lagt frumvörp fyrir Alþingi, sem fela í sér meiri skattaívilnanir, en gildandi lög leyfa, og um að ríkissjóður greiði hafnargerð á Húsavík, lóðaframkvæmdir á Bakka og vegtengingar milli lóðar og hafnar. Á Alþingi í gærkvöldi sagði Steingrímur þessar ívilnanir nauðsynlega forsendu þess að ráðist yrði í uppbygginguna og flokka mætti þetta sem byggðastuðning við nýtt iðnaðarsvæði sem lægi langt frá suðvesturhorninu.

Og raunar sagði Steingrímur í þinginu í gærkvöldi að vegna aukinna tekna og umsvifa yrði ríkið sennilega búið að fá allt sitt til baka strax í lok byggingartímans.

Rætt var við Berg Elías Ágústsson, bæjarstjóra Norðurþings, í kvöldfréttum Stöðvar 2.