Ekki ofmælt að tala um að lygin viðhaldi stríðinu

Það var hart tekist á á Alþingi í dag undir liðnum störf þingsins. Ásta Ragnheiður Jóhannesdóttir, forseti Alþingis, bað Sigmund Davíð Gunnlaugsson að gæta orða sinna í ræðustól þegar hann sagði að menn leyfðu sér að ljúga til þess að viðhalda stríði. Sjálfur varð hann undrandi þegar forseti þingsins bað hann um að gæta orða sinna.

Sigmundur spurði hvað það var sem hann hefði sagt.

„Að ljúga," svaraði Ásta Ragnheiður. Sigmundur svaraði um hæl: „Það var ekki ofmælt."

Sigmundur Davíð var nokkuð harðorður í fyrr ræðu sinni þar sem hann sagði þingmenn setja aðra þingmenn í þá stöðu að svara þvættingi og lygum þegar tímanum væri betur varið í að ræða uppbyggingu atvinnulífs og skuldastöðu heimilanna.

Þar vísaði hann til harðrar gagnrýni Vinstri grænna vegna tilkynningar sem Framsóknarflokkurinn sendi frá sér í gærdag varðandi stjórnarskrármálið. Meðal annars kom fram í tilkynningunni, sem mbl.is birti, að náttúruauðlindir og landsréttindi í þjóðareign mætti ekki selja eða láta varanlega af hendi til einstaklinga eða lögaðila. Svo var bætt við:

„Þó má veita þeim heimild til afnota eða hagnýtingar á þessum auðlindum og réttindum gegn gjaldi, að því tilskildu að hún sé tímabundin eða henni megi breyta með hæfilegum fyrirvara eftir því sem nánar er ákveðið í lögum. Slík heimild nýtur verndar sem óbein eignarréttindi."

Álfheiður Ingadóttir gagnrýndi þetta með óbeinu eignarréttindin harðlega og kallaði ítrekað fram í fyrir Sigmundi þegar hann hélt ræðu sína, svo mikið raunar að Sigmundur bað forseta Alþingis um að tryggja sér hljóð á meðan hann talaði.

Álfheiður kom seinna í ræðupúlt og gerði bloggfærslu Sigmundar Davíðs að umtalsefni, en þar sakar hann Vinstri græna um ósannindi og ofstopa og að hafa snúið algjörlega út úr þessum orðum sem fram koma í fyrrnefndri tilkynningu. Álfheiður sagði engan vafa á skilningi flokksins, og las upp úr tilkynningu Framsóknarflokksins sem birtist á mbl.is og sagði lítið svigrúm til þess að misskilja orð flokksins um að tryggja öðrum en þjóðinni óbeinan eignarrétt á auðlindum.

Undir lokin var kosið um það hvort umræðum yrði framhaldið. Það var fellt, en sjö starfsdagar eru eftir af Alþingi. Rætt verður um 22 mál í dag. Þar á meðal um stjórn fiskveiða og Uppbygging innviða vegna atvinnustarfsemi í landi Bakka og fjallað er ítarlega um í forsíðufrétt Fréttablaðsins í dag.