Kærir flugdólg og vill milljónir í bætur

Icelandair hefur lagt fram kæru gegn manni sem var handtekinn eftir að hann sýndi af sér ógnandi framkomu um borð í flugvél félagsins í lok júlí. Vélin var á leið til Seattle í Bandaríkjunum en var snúið við eftir um klukkustundar flug.

Guðjón Arngrímsson, upplýsingafulltrúi Icelandair, staðfesti í samtali við Vísi að félagið hefði lagt fram kæru gegn manninum fyrir nokkrum dögum. Lögreglan á Suðurnesjum mun síðan ákveða hvort ákæra verður gefin út.

Icelandair fer fram á skaðabætur vegna málsins. Guðjón vildi ekki segja hversu háa upphæð félagið fer fram á en sú upphæð hleypur þó á milljónum.

Flugvélinni hafði sem áður segir verið á flugi í tæpa klukkustund þegar maðurinn hóf dólgslætin. Vélinni var snúið við og var maðurinn handtekinn við komuna til Keflavíkur. Samkvæmt reglum flugfélagsins þurfti meðal annars að skipta um áhöfn.