Vond vika hjá Kanye

Kanye West er ekki í sérstaklega góðum málum um þessar mundir.

Fyrst var hinn þrjátíu og sex ára gamli rappari vændur um gyðingahatur fyrir ummæli sem hann lét falla í útvarpsþætti í New York.

„Leyfðu mér að segja þér dálítið um George Bush og olíupeninga og Obama og enga peninga,“ sagði Kanye í viðtali þann 26. nóvember síðastliðinn. „Fólk vill meina að Obama geti ekki framkvæmt ákveðna hluti eða sé ekki að framkvæma þá. Það er vegna þess að hann er ekki með samböndin... Svart fólk hefur ekki sömu sambönd og gyðingar. Svart fólk hefur ekki sömu sambönd og olíufólk.“

Ummæli Kanye voru víða gagnrýnd og kölluð gyðingahatur af mörgum. Abraham H. Foxman, formaður Anti-Defamation League, sem berst gegn óhróðri gegn gyðingum, var einn af þeim sem töluðu um atvikið.

„Þetta er ekta gyðingahatur. Enn og aftur, sú eldgamla mýta um að gyðinga séu allir valdamiklir og stjórni pólítíkinni. Sem poppstjarna með marga aðdáendur ætti Kanye West að vita betur. Við vonum að hann taki ábyrgð á orðum sínum, skilji af hverju þau eru móðgandi, og biðji þá afsökunar sem hann hefur móðgað.“

Svarið frá Foxman birtist nokkrum klukkutímum áður en Kanye hélt tónleika í Kansas, þar sem einungis fjórðungur miða á tónleikana seldust.

Kanye lét þó dræma mætingu ekki á sig fá og þótti standa sig með prýði.

„Ég segi ekki alltaf réttu hlutina,“ viðurkenndi Kanye á sviði á tónleikunum í Kansas. „Ég er betri í því að segja vitlausa hluti á vitlausum tíma,“ bætti hann við.