ASÍ slítur viðræðum við SA

ASÍ telur forsendur brosnar í samningaviðræðum við SA. Viðræðunum hefur verið slitið.

Í tilkynningu frá ASÍ segir að samninganefnd samtakanna hafi á undanförnum vikum unnið að því að leggja grunn að aðfarasamningi við Samtök atvinnulífsins, þar sem þess yrði freistað að ná auknum kaupmætti, tryggja stöðugleika í efnahagsmálum og lága verðbólgu.

Ágætur árangur hafi náðst um umgjörð slíks samnings en síðan segir:

„Í dag kom hins vegar í ljós djúpstæður ágreiningur við SA um launalið væntanlegs samnings, einkum það sem snýr að hækkun lægstu launa.

Svo langt er á milli aðila að samninganefnd ASÍ telur forsendur brostnar fyrir þeirri leið sem átti að varða.

SA hafnar þeirri kröfu ASÍ að hækka lægstu laun um ákveðna krónutölu. Því hefur samninganefnd ASÍ tilkynnt SA að viðræðum á þessum grunni sé hætt.

Framhald viðræðna um gerð nýrra kjarasamninga er í höndum aðildarsamtaka ASÍ.“