Hinn hagsýni leigir nema hann taki sportið alla leið

Skíðamenn búast við góðri verðtíð í vetur að sögn formanns Skíðasambands Íslands. Það er ekki tekið út með sældinni að leggjast í kaup á nýjum búnaði en hann endist í tíu ár að meðaltali og kostnaðurinn jafnast út.

Ef vetur konungur verður skíðamönnum hliðhollur er ærin ástæða til að draga fram skíðin í vetur. Á gönguskíðum eru átökin meiri en líkamlegt atgervi gönguskíðamanna er vel þekkt. Þeir sem vilja komast hratt og njóta þess að láta adrenalínið jafnast út með heitt kakó uppi í skála eftir á fara á svigskíði. Margir eiga frábærar minningar úr KR-skálanum í Skálafelli eða í stólalyftunni í Bláfjöllum. Duttlungar veðurguðanna hafa hins vegar gert það að verkum að margir komast ekki eins oft á skíði og þeir kjósa, en skíðamenn eru bjartsýnir fyrir veturinn.

Á meðaljóninn, sem fer 5 sinnum í skíði yfir veturinn að leigja eða kaupa skíðabúnað?

Stofnkostnaður nýs búnaðar er verulegur, en hjá þeim sem stunda íþróttina af ástríðu er þetta fljótt að borga sig upp.

Fréttastofan fór og athugaði með stofnkostnað nýs búnaðar í milliverðflokki. Vandaðan búnað sem á að endast í tíu ár. Sjá má heimsókn í sportvöruverslun í meðfylgjandi myndskeiði.

Stofnkostnaður - milliverð á vönduðum búnaði

Skíði með bindingum          84.990 kr.

Skíðaskór                          39.900 kr.

Hjálmur                             11.900 kr.

Stafir.                                  4.900 kr.

Samtals:                         141.690 kr.

Ef menn vilja sleppa hjálmi þá eru þetta tæpar 130 þúsund krónur. Tekið skal fram að hér er um að ræða búnað frá einu af toppmerkjunum í heiminum. Ef búnaðurinn endist í tíu ár er þetta kostnaður upp á 13.000 kr. á ári. Hér er miðað við stofnkostnað fyrir fullorðinn einstakling.

Hvað á meðaljóninn að fara oft á skíði yfir veturinn til að það borgi sig að fjárfesta í nýjum búnaði? „Ég myndi segja þrisvar sinnum, eitthvað svoleiðis. Ef hann fer oftar en það fer það að borga sig. Fljótt að koma. Fyrir börn eru pakkarnir frá þrjátíu þúsund krónum,“ segir Örn Hjálmarsson, verslunarstjóri og skíðaáhugamaður.

Miðað við leigu á búnaði, þ.e skíðum og skóm, í kringum 5.000 kr. fyrir daginn er þetta ekki fjarri lagi. 

Hvað erum við að tala um í endingartíma á góðum búnaði? „Það er algengt að fólk skipti á tíu ára fresti um búnað, tíu til fimmtán ára fresti. Þetta er auðvitað fjárfesting til margra ára og fólk fer auðvitað í ferðir. Þetta býður upp á að maður fari til Akureyrar að skíða. Fólk á höfuðborgarsvæðinu er farið að fara mikið þangað, í skíðabæinn,“ segir Örn.

Aukning hjá fjölskyldufólki að sækja í sportið

Einar Þór Bjarnason, formaður Skíðasambands Íslands, er bjartsýnn fyrir veturinn.

Eiga skíðamenn góða vertíð í vændum?

„Við ætlum rétt að vona það. Það bendir allt til þess eins og veðurguðirnir hafa leikið okkur að það safnist snjór í fjöllin og ég heyri og finn á fólki að það er spennt að fara. Mér heyrist líka að það sé talsverð aukning hjá fjölskyldufólki að sækja í sportið,“ segir Einar Þór.

Nú hafa skíðin átt undir högg að sækja gagnvart snjóbrettunum, sérstaklega hjá unglingum, en það er stöðug nýliðun meðal iðkenda í skíðaíþróttinni? „Við erum að sjá sérstaklega núna í ár mikla nýliðun hjá félögunum úti um allt land. Svo er annað sem er að gerast að aukning í brettunum hefur kannski aðeins dalað og við erum að sjá aukningu í free-style skíðum, leikskíðum. Eins er vöxtur í fjallaskíðum og göngumennsku.“