Grunur um íkveikju í Mini Market

Pólska verslunin Mini Market í Breiðholti er gjörónýt eftir mikinn bruna í nótt. Eigandinn lagði allt sitt fé í að opna verslunina á sínum tíma og er óviss um hvort hann geti endurbyggt hana að nýju. Grunur er um íkveikju.

Slökkviliðið á höfuðborgarsvæðinu fékk tilkynningu um bruna í matvöruversluninni Mini Market laust fyrir klukkan fjögur í nótt. Vel gekk að ráða niðurlögum eldsins sem að sögn varðstjóra var talsverður. Aðeins tók örfáar mínútur að slökkva eldinn.

Tæknideild lögreglunnar rannsakaði eldsupptök í dag en vildi ekki staðfesta við fréttastofu að um íkveikju væri að ræða. Eldurinn kom upp við hurð sem áður var annar útgangur verslunarinnar. Allar vörur og tæki verslunarinnar gjörónýt eftir bruna næturinnar.

Vinsæl verslun í samfélagi Pólverja

Piotr Jakubek hefur rekið þessa vinsælu pólsku matvöruverslun ásamt fjölskyldu sinni undanfarin níu ár. Hann áformaði að kaupa verslunarhúsnæðið, sem verslunin er í, síðar í þessum mánuði. Bruninn setur rekstur búðarinnar í uppnám en óljóst er hvort að tryggingar bæti allt það tjón sem varð í nótt.

„Ég trúi þessu ekki. Ég er ekki viss hvað ég ég á að gera,“ sagði Piotr í samtali við fréttastofu Stöðvar 2. Mini Market verslunin hefur verið mjög vinsæl í samfélagi Pólverja á höfuðborgarsvæðinu og hafði fest sig í sessi í Drafnarfelli.

„Ég er búinn að setja nánast allt mitt líf í þessa búð og konan mín segir stundum að búðin sé þriðja barnið mitt,“ bætir Piotr við. Líklega mun taka tvo til þrjá mánuði að koma versluninni aftur af stað og því ljóst að jólaverslun er úr sögunni hjá Mini Market.