Barnaníðshringur til skoðunar hjá Ríkislögreglustjóra

Tilkynningar kanadísku lögreglunnar um umfangsmikinn barnaníðshring sem hún hefur upprætt eru til skoðunar hjá Ríkislögreglustjóra.

Málið teygði anga sína til Íslands en 348 voru handteknir í kjölfar rannsóknar sem stóð yfir í þrjú ár og voru tæplega 400 börn frelsuð undan barnaníðingum.

Rannsóknin sneri aðallega að fyrirtæki í Toronto sem seldi DVD diska og aðgang að barnaklámi á netinu.

Paul Krawczyk, yfirmaður kynferðisbrotadeildar lögreglunnar í Toronto, sagði í viðtali við Stöð 2 í síðustu viku, að þeir hafi komist að því að kaup voru meðal annars gerð frá Íslandi.

Stefán Eiríksson, lögreglustjórinn á höfuðborgarsvæðinu, segir í samtali við Vísi að málið sé ekki komið frá Ríkislögreglustjóra inn á borð til þeirra.

Ríkislögreglustjóri skoðar nú málið og sendir það síðan til viðeigandi lögregluembætta ef gögnin sem send voru frá Kanada teljast grundvöllur til frekari rannsókna hérlendis.