Ný biðdeild opnuð á Vífilsstöðum í dag: "Það ætti að hætta notkun slíkra deilda"

Húsnæðið á Vífilsstöðum hefur staðið autt frá því í apríl en í dag verður opnuð þar ný deild fyrir sjúklinga af Landspítalanum sem bíða flutnings á hjúkrunarheimili. Um biðdeild er því að ræða.

Talað hefur verið um að þarna skapist 42 rými, sem ætlað er að létta álagi af lyflækningasviði Landspítalans, en sumir starfsmenn spítalans eru ósáttir við þá túlkun, þar sem 18 rýma hjúkrunardeild verður í raun flutt á Vífilsstaði, af Landakoti. „Á móti kemur að deildinni á Landakoti, með 18 rúmum, verður lokað og samkvæmt reikningum sem ég lærði í barnaskóla þá mun biðrýmum í öldrun fjölgar um 24,“ segir Sigrún Huld Þorgrímsdóttir, hjúkrunarfræðingur og sérfræðingur í öldrunarhjúkrun.

Sigrún segir að fólk sem lokið hafi meðferð eigi ekki að liggja á Landspítalanum; það sé slæm meðferð á opinberu fé og ekki gott fyrir sjúklingana. Að því leyti sé gott að fá ný rými á Vífilsstaði en hún er hins vegar ósátt við biðdeildir yfir höfuð og vill að notkun þeirra verði hætt. „Það er nógur flækingur á gamla fólkinu samt, áður en það kemst á hjúkrunarheimili. Það ætti að fara beint af endurhæfingardeildinni sem það er statt á, eða þess vegna bráðdeildinni og yfir á hjúkrunarheimili,“ segir Sigrún.

Ekki hefur verið hægt að útskrifa allt að 50 sjúklinga af Landspítalanum vegna skorts á hjúkrunarheimilum og Sigrún segir heimaþjónustu líka fjársvelta og undirmannaða. Stefna stjórnvalda sé að sem flestir geti búið heima hjá sér sem lengst, en úrræði skorti. „Það hefur verið unnið talsvert í því, sérstaklega hjá Reykjavíkurborg, að bæta heimaþjónustuna en ég myndi nú samt segja að hún væri á „barnaveikistiginu“ ennþá, ef hún er borin saman við skandinavísku löndin.“