Heyrði öskur og hélt að það væri verið að drepa einhvern

Maður á þrítugsaldri var í dag dæmdur í átta mánaða fangelsi í Héraðsdómi Reykjaness fyrir húsbrot og líkamsárás með því að hafa brotist inn til fyrrverandi unnustu sinnar, haldið henni innandyra, kastað henni í rúm og sett sæng yfir andlit hennar. Hún hlaut kúlu yfir hægri augabrún, roða yfir kinnbeinum og kinnum auk sára innan á efri og neðri vör. Þá var maðurinn einnig sviptur ökuréttindum ævilangt.

Árásin átti sér stað í Reykjanesbæ í maí síðastliðnum. Maðurinn ruddist inn á heimili fyrrum sambýliskonu sinnar og réðst á hana. Fór hann inn um svaladyr hússins og þegar konan reyndi að hlaupa út um útidyrahurðina greip hann í hana og hélt fyrir mun hennar. Því næst ýtti hann henni inn í svefnherbergið og hélt sæng fyrir vitum hennar svo hún átti erfitt með andardrátt.

Vitni sagðist í skýrslutöku hafa heyrt að ákærði var að banka í gluggana og síðan einhvern rífa upp hurð. Nokkrum sekúndum síðar hafi það heyrt mikil öskur og hafi hugsað að það væri verið að drepa einhvern.

Vitnið hafi verið háttað en hlaupið út í garð og séð að svalahurðin hjá brotaþola hafi verið opin. Vitnið fór að hurðinni og hrópað inn og spurði hvað væri að gerast. Öskrin hafi ekki hætt svo vitnið hafi farið inn í íbúðina og séð hvar ákærði lá ofan á brotaþola í svefnherberginu.

Fram kemur í dómnum að árásarmaðurinn hafi verið mjög ölvaður en unnustan fyrrverandi lýsti því að hún væri mjög hrædd við hann. Systir hennar hefði meðal annars þurft að vera heima hjá henni svo hún gæti farið í sturtu. Hún hafi alltaf séð til þess að gluggar væru lokaðir og hurðir læstar.

Maðurinn þarf að greiða fórnarlambinu 400 þúsund krónur í skaðabætur sem og allan sakarkostnað.