Rekinn úr landsliðinu fyrir að líkja þjálfaranum við Mr. Bean

Rúmenski framherjinn Adrian Mutu hefur verið duglegur að koma sér í vandræði allan sinn feril. Hann er langt frá því að vera hættur þeirri iðju.

Mutu ákvað að líkja landsliðsþjálfara Rúmeníu, Victor Piturca, við sjálfan Mr. Bean. Þó svo Bean þyki vera fyndinn þá hafði rúmenska knattspyrnusambandið engan húmor fyrir þessu uppátæki.

Mutu setti myndina, sem fylgir fréttinni, á Facebook-síðu sína og er fyrir vikið kominn í ævilangt bann frá rúmenska landsliðinu.

Ástæðan fyrir því að Mutu ákvað að gera grín að þjálfaranum er sú að hann var ekki valinn í landsliðið fyrir umspilsleikina gegn Grikkjum.

Hann fékk í kjölfarið bréf frá knattspyrnusambandinu þar sem hann fékk að vita að ekki yrði leitað til hans aftur.

Mutu, sem orðinn er 34 ára gamall, tók myndina út af Facebook-síðu sinni.