Ólína krefst rökstuðnings frá útvarpsstjóra

Ólínu Þorvarðardóttur segir það sæta verulegum tíðindum að Páll Magnússon útvarpsstjóri hafi fallið frá því ferli að ráða dagskrárstjóra útvarps og krefst skýringa.

„Þetta eru mjög óvænt tíðindi og undarleg. Vegna þessa að ég sá nú ekki betur en þarna væri ágætis mannval sem var að sækja um og margir hæfir. Ég kannast við það að hægt sé að hafna öllum umsóknum ef umsækjendur uppfylla ekki hæfnisskilyrði en að það sé gert þegar um er að ræða hæfa einstaklinga, þá sætir það tíðindum,“ segir Ólína Þorvarðardóttir, fyrrverandi alþingismaður.

Vísir greindi frá því í dag að Páll Magnússon hafi horfið frá því að ráða í stöðu dagskrárstjóra útvarps en umsækjendur eru þegar komnir fram. Í samtali við Vísi segist hann hafa sínar ástæður fyrir því en hann kæri sig ekki um að ræða þær opinberlega. Ólínu þykir þetta skjóta skökku við.

„Forstöðumenn ríkisstofnana hafa heimilid til að hafna öllum umsækjendum. En þegar þeir gera svo þegar umsækjendur eru greinilega hæfir, að minnsta kosti einn sem ég veit um, sætir þetta vissulega tíðindum. Mér finnst að Páll þurfi að rökstyðja þetta, ekki bara fyrir umsækjendum heldur alþjóð. Hvað kostaði þetta ferli, til dæmis, ef það á svo ekkert að koma út úr því?“

Ólína segist engar útskýringar hafa fengið. Henni barst skeyti frá mannauðsstjóranum sem hún segir svipa til athugasemdar sem útvarpsstjóri sendi svo starfsmönnum. „Ég hef beðið um rökstuðning. Mér finnst lágmark að stofnun sem rekin er fyrir almannafé, er í eigu almennings, að hún útskýri gjörðir sínar fyrir þeim sem í hlut eiga. Eitthvað eru það einkennilegar ástæður sem ekki má ræða opinberlega.“

Sé litið til ferils Ólínu er erfitt að draga þá niðurstöðu að hún sé óhæf til að genga starfi dagskrárstjóra útvarps. Hún hefur starfað sem þingmaður, hún er með doktorspróf í íslenskum bókmenntum og þjóoðfræðum, hún var nýlega metin hæf til að gegna stöðu forseta hug- og félagagsvísindasvíði Háskólans á Akureyri, er með stjórnunarnám og mikla stjórnunarreynslu auk þess sem hún starfaði á árum áður sem fréttamaður Ríkisútvarpsins í fjögur ár og hefur starfað þar dagskrárgerðarmaður og sjálfstæður pistlahöfundur.

„Við umsækjendur hljótum að spyrja okkur hvaða meinbugir séu á okkur sem réttlæta þessa málsmeðferð? Ég með minn bakgrunn. Eða er það kannski tilfellið að það sé komið atvinnubann á þá sem hafa stutt Samfylkingu og vinstrihreyfingu á Íslandi? Það er hægt að hringja persónulega í Gísla Martein Baldursson og bjóða honum starf, sækja hann úr borgarpólitíkinni, en svo sækja tveir reynslumiklur fyrrverandi alþingismenn um og þá er ekki hægt að ráða í starfið?! Hvaða ástæður eru þetta? Hvernig getur Páll sagt að hann hafi sínar ástæður sem hann kærir sig ekki um að greina frá? Hverskonar ástæður geta það verið? Sem ekki þola dagsljósið?“ spyr Ólína.