Íþróttamálaráðherra vonglaður í Zagreb

Illugi Gunnarsson íþróttamálaráðherra flaug til Zagreb í gær. Hann segir mikla stemmningu ríkja meðal Íslendinga sem mættir eru til að fylgjast með leiknum.

„Það er heilmikill hugur í okkar mönnum. Maður fann það bara að um leið og við lentum í gærkvöldi. Flugvélin var varla búin að snerta flugbrautina þegar allir hrópuðu: Áfram Ísland. Það gaf til kynna hver stemmningin yrði á leiknum. Þannig að það er heilmikill hugur í öllum, Virkilega fín stemmning, það er ekki hægt að segja annað,“ segir Illugi Gunnarsson.

Leikurinn er mikilvægur hvernig sem á það er litið.

„Hann er einstakur í íþróttasögu okkar þjóðar. Auðvitað höfum við áður verið í merkilegum sporum, ef svo má segja, eins og til dæmis þegar íslenska handknattleikslandsliðið lék til úrslita í Peking. Síðan er það þessi leikur, sem ræður því hvort Íslandi takist að komast á heimsmeistararmótið í knattspyrnu. Við værum þá fámennasta þjóðin sem hefði unnið það afrek. Ég ætla að segja það líka að nú þegar hefur afrek verið unnið. Þetta er auðvitað stórkostlegur árangur hjá þessum drengjum og sama hver úrslitin verða núna þá getum við öll verið mjög stolt af okkar landsliði.“

En, varðandi hag íþróttahreyfingarinnar... Menn hafa talað um að þetta skipti verulegu máli fjárhagslega. Hafa menn í ráðuneytinu eitthvað skoðað það sérstaklega?

„Nei, ég hef nú ekkert sest yfir það nákvæmlega, hvað það myndi þýða? Fyrst er nú þá að reyna að vinna leikinn og sjá svo hvað það þýðir. Aðalatriðið er, burtséð frá fjárhagslega þætti málsins, myndi það vekja heilmikla athygli á landi og þjóð ef okkur tækist þetta. En, vil minna á að stærsta afrekið hefur nú þegar verið unnið. Frammistaða þessa liðs í riðlakeppninni, frammistaðan í leiknum gegn Króatíu heima... auðvitað sýndi það að þarna er um afburða íþróttamenn að ræða. Svo er fjárhagshliðin annað mál en menn hafa þá tækifæri til að setjast yfir það í framhaldinu.“

Illugi er bjartsýnn fyrir leikinn. Spá? Hvernig fer leikurinn? „Ég veit það bara að við eigum möguleika. Við sáum það í leiknum heima á Íslandi að þeir stóðu af sér pressuna verandi einum færri allan seinni hálfleikinn. Ég ætla að leyfa mér að trúa því að við eigum ekkert mikið minni séns en Króatarnir. Auðvitað erum við á heimavelli þeirra. En, við þurfum bara að skora eitt mark og þá setjum við alveg gríðarlega pressu á þá. Þannig að, úr því við eigum séns og eigum von, þá er ekkert annað en láta sig hlakka til.“