"Guð forði okkur frá því að fá berkla sem engin lyf vinna á"

Alþjóðaheilbrigðismálastofnunin varar nú við því að fjölónæmir berklar, sem eru ónæmir fyrir hefðbundnum berklalyfjum, gætu orðið alvarlegur faraldur víða um heim.

Hvernig á maður að taka svona fréttum hér á Íslandi?

"Maður á að taka þeim mjög alvarlega og huga að þessu vandamáli, og það gerum við með því að fylgjast með fólki sem er að flytjast til landsins,“ segir Haraldur Briem, sóttvarnalæknir.

Á árunum 1991 til 1997 kom upp eitt tilfelli fjölónæmra berkla hér á landi. Næstu sex ár komu engin upp en næstu sex ár eftir það voru þau þrjú af 62 tilfellum, eða 4,8%. Þetta þótti vísbending um að tilfellum fjölónæmra berkla væri að fjölga hér á landi líkt og annars staðar. Síðan hafa komið upp tvö tilfelli hérlendis. „Fjölónæmir berklar eru miklu vandmeðfarnari, meðferðarúrræðin eru miklu færri og dýrari þannig að þetta verður erfitt ef það verður fjölgun á slíkum tilfellum. Og guð forði okkur frá því að fá berkla sem engin lyf vinna á,“ segir Haraldur.

Samkvæmt grein í Læknablaðinu frá árinu 2009 er líklegt að tilfellum fjölónæmra berkla muni fjölga hérlendis í ljósi aukinna fólksflutninga og vaxandi lyfjaónæmis og tekur Haraldur undir það. Kostnaður við hvert tilfelli er gríðarlegur, lítum á íslenskt dæmi:

Kostnaður við lyfjameðferð sjúklings í sjúkrahúslegu var um 750.000 kr á mánuði í tæpa sjö mánuði og eftir útskrift um 230.000 á mánuði í 15 mánuði, alls um 9 milljónir (á verðlagi maímánaðar 2008). Ofan á þetta leggst legudagakostnaður á lyflækningasviði Landspítalans, tæpar 11 milljónir á sjö mánuðum. Samtals eru þetta 20 milljónir króna.

Haraldur segir skipulag berklavarna ágætt hér en vegna frjáls flæðis fólks innan EES hefur reynst erfitt að beita komuskimun. Spurður um hvort eðlilegt sé að pólitík hafi áhrif á forvarnastarf gegn smitsjúkdómum segir hann: „Ja sko, berklabakterían og aðrar bakteríur, þær virða enga samninga.“