St. Jósefsspítali að breytast í draugahús

St. Jósefsspítali í Hafnarfirði er að smám saman að breytast í draugahús útaf viðhaldsleysi. Þetta kom fram í máli Margrétar Gauju Magnúsdóttur, varaþingmanns Samfylkingarinnar, á Alþingi í dag.

Margrét spurði Kristján Þór Júlíusson, heilbrigðisráðherra, hvort það standi til að selja húsnæði St. Jósefsspítala eða taka það aftur í notkun. Margrét sagði að húsnæðið væri smám saman að drabbast niður útaf viðhaldsleysi og minnti helst á draugahús í dag.

Ráðherra sagði að ýmislegt hefði verið skoðað á síðustu árum og útilokaði ekki að húsið verði selt. Hann sagði hins vegar að það væri ekki í myndinni að opna þar spítala á ný.