Hanskar Daða upp í hillu

Markvörðurinn Daði Lárusson hefur lagt hanskana á hilluna. Hann tilkynnti stuðningsmönnum FH ákvörðun sína í dag.

Daði lék fyrst með FH sumarið 1992 þar sem hann átti eftir að spila stærstan hluta ferilsins. Hann afrekaði að spila sinn 300. deildarleik í sumar en hann leysti Róbert Örn Óskarsson af hólmi í marki Hafnfirðinga þegar á þurfti að halda.

Daði varð fimm sinnum Íslandsmeistari með FH á árunum 2004-2009. Hann hélt í raðir erkifjendanna í Haukum árið 2010 og lék með þeim rauðklæddu í tvö tímabil. Daði er annar leikmaður FH sem leggur skóna á hilluna í lok leiktíðar. Freyr Bjarnason gerði slíkt hið sama á dögunum.

Tilkynningu Daða, sem varð fertugur á dögunum, má sjá hér að neðan.

Kæru FH-ingar !

Það er runnin upp sú stund að ég verð að leggja skó og hanska á hillu og láta þetta gott heita. Önnur verkefni bíða mín og er mínu stærsta verkefni í lífinu hingað til sem knattspyrnumaður hjá FH því hér með lokið.

Ég geng mjög sáttur frá borði og er vægast sagt ánægður með þann feril sem er að baki. Að fá að taka þátt í öllum þeim ævintýrum sem þessi stærsti og öflugasti klúbbur seinni ára á Íslandi hefur afrekað, er vitaskuld hreinn draumur fyrir hvern knattspyrnumann.

Ég er ofboðslega þakklátur þeim sem að því komu, bæði stjórn og þjálfurum FH, fyrir að gefa mér færi á að lenda ferlinum á þeim stað sem er manni hvað kærastur.

Stórkostleg uppbygging hefur átt sér stað í Krikanum frá því að fyrsta Íslandsmeistaratitli FH í knattspyrnu var fagnað og upphafi þess, sem ég leyfi mér að kalla gullaldartímabil knattspyrnudeildarinnar, hófst fyrir alvöru. Að fá að vera þátttakandi í því frá byrjun eru því algjör forréttindi fyrir mig sem FH-ing. Það verður því ekki síður spennandi fyrir mig að fá að fylgjast með klúbbnum á hliðarlínunni vaxa og dafna í komandi framtíð.

Bestu þakkir og kveðjur til ykkar allra !!

Við erum FH.......

Daði Lárusson