„Það eru allir búnir að fá nóg“

Formaður félags íslenskra röntgenlækna segir að Landspítalinn þurfi að fara að hugsa sinn gang varðandi mönnun sérfræðilækna á spítalanum. Álag á sérfræðilæknum á myndgreiningardeild hefur aukist um fimmtíu prósent á síðustu fimm árum.

Sex yfirlæknar á Landspítalanum skrifa grein í Fréttablaðið í dag um vandann sem myndgreiningardeild, eða röntgendeild, á við að etja.

Maríanna Garðarsdóttir, sérfræðingur og formaður félags íslenskra röntgenlækna, segir að ástandið á myndgreiningardeildinni hafi lengi verið slæmt. Tækjabúnaður sé orðinn lélegur og deildin illa mönnuð.

„Okkur hefur fækkað um nánast um þriðjung frá árinu 2008, á sama tíma hefur framleiðninin á deildinni, eða mælanlegur fjöldi rannsókna sem við sinnum og lesum úr, aukist um 50 prósent. Sem þýðir það að þeir sem eftir eru hlaupa hraðar,“ segir Maríanna.

Ef þetta heldur svona áfram, hvað gerist?

„Það er mjög góð spurning. Frá árinu 2008 hefur okkur á spítalanum verið talin trú um að þetta sé allt saman að fara að batna. Fyrstu fimm árin trúði maður því alveg en síðasta árið finnur fólk að þetta er komið gott. Það eru allir búnir að fá nóg. Núna stöndum við frammi fyrir því að sérfræðilæknar á deildinni eru orðnir það fáir að við getum ekki með góðu móti sinnt þeim verkefnum sem af okkur ætlast,” segir hún.

Bendir hún að nauðsynlegt sé að halda í það fólk sem eftir er, enda sé Landspítalinn sé ekki samkeppnishæfur við sjúkrahús annars staðar í heiminum.

„Aðrir leita í vinnu annað hér á landi, eða í fjarvinnu. Þannig það er stærsti vandinn. Landspítalinn þarf að fara hugsa sinn gang um mönnun sérfræðilækna almennt á spítalanum.“

Hún segir að hljóðið á læknum á deildinni sé ekki gott.

„Fólk er orðið óskaplega þreytt, það er kannski vandinn að við erum öll orðin svo þreytt að fólk nennir ekki að berjast,” segir hún að lokum.