Umfjöllun um ofbeldi í skólum: Flestir foreldrar ánægðir með samskipti skólastarfsfólks við börn

Í umfjöllun í Íslandi í dag í gærkvöldi um ofbeldi og vanrækslu í íslenska skólakerfinu, kom fram að formaður Regnbogabarna fær mörg símtöl á dag frá foreldrum sem telja að brotið sé á börnum þeirra. Fréttastofa hefur ítrekað reynt að afla upplýsinga um fjölda kvartana vegna framkomu kennara og annarra skólastarfsmanna við börn, en eftir því sem við komumst næst heldur enginn utan um þessar tölur. Ómögulegt virðist því að fá yfirsýn yfir umfang vandamálsins.

Áhugavert er þó að skoða tölur úr foreldrakönnun Skólapúlsins sem 105 grunnskólar notuðu við innra sjálfsmat í mars síðastliðnum. Í úrtakinu voru um 8.600 foreldrar og var svarhlutfall á bilinu 70 til 100%. Nokkrar spurningar snertu á ánægju foreldra með samskipti starfsfólks skólanna við börnin og svöruðu foreldrar hvort þeir væru mjög ánægðir, frekar ánægðir, frekar óánæðir eða mjög óánægðir með samskiptin.

Spurt var um ánægju foreldra með samskipti umsjónarkennara við barnið og þar sögðust 57 foreldrar eða 0,8% svarenda mjög óánægðir. 3% sögðust frekar óánægðir sem þýðir að 96,2% foreldra voru ánægðir.

Einnig var spurt um ánægju með samskipti annarra kennara en umsjónarkennara við barnið og þar sögðust 58 foreldrar eða 0,8% svarenda mjög óánægðir. Þá voru 5,5% frekar óánægðir, sem þýðir að 93,7% foreldra voru ánægðir.

Loks var spurt um ánægju með samskipti starfsfólks, annarra en kennara, við barnið og þá sögðust 70 foreldrar, eða 1% svarenda, mjög óánægðir. 5,2% voru frekar óánægðir sem þýðir að 93,8% voru ánægðir.

Samkvæmt könnuninni er því mikill meirihluti foreldra ánægður með samskipti kennara og annarra skólastarfsmanna við börnin en eftir stendur hópur fólks sem upplifir festuleysi.

Margir sem telja kennara eða aðra skólastarfsmenn hafa brotið á börnum sínum, hafa haft samband við fréttastofu í dag og segja óljóst hvert á að leita með slík vandamál, að enginn hlutlaus aðili rannsaki þau mál sem upp komi og að lítið sem ekkert eftirlit virðist haft með Olweusaráætluninni gegn einelti, sem margir skólar vinna eftir.