Farsíminn og flautan skiptu sköpum

Björgunarsveitarmenn fundu um klukkan eitt í nótt mann sem leitað hafði verið að við Svínafellsjökul. Farsími mannsins, sem og flauta sem hann var með á bakpoka sínum, urðu líklega til þess að hann fannst heill á húfi.

Maðurinn hugðist ganga upp að Hrútfallstindum en um sex leytið hringdi hann í systur sína í Póllandi og sagðist vera villtur. Hún hafði í kjölfarið samband við lögreglu hér á landi og fóru fyrstu björgunarsveitarmenn frá Hornafirði af stað um klukkan hálf sjö í gærkvöldi.

Baldvin Guðlaugsson í björgunarfélagi Hornafjarðar tók þátt í leitinni í gærkvöld.

„Við vissum að hann væri á þessari gönguleið svo mesti fókusinn fór það svæði. Þyrlan kom svo og flaug yfir með miðunarbúnað fyrir símann hans. Hann heyrði í þeim og gat sent SMS þeim hvar hann væri, og hvenær þyrlan væri yfir sér. Menn gátu staðsett hann nokkurn veginn. Það var mikil þoka, skyggni undir 5 metrar,“ segir hann.

Maðurinn fannst í Hafrafelli í um 900 metra hæð rétt um klukkan eitt.

„Hann var búinn að koma sér í skjól undir steini og var orðinn mjög kaldur. Svo rifum við hann úr fötunum og settum hann í hlý og góð föt, og settum smá næringu í hann. Hann var mjög duglegur og labbaði sjálfur niður. Þetta gekk hægt því það var lélegt skyggni og erfitt yfirferðar.“

Baldvin segir að GSM miðunarbúnaður Landhelgisgæslunnar hafi hjálpað björgunarsveitarmönnum að staðsetja manninn nákvæmlega, og þá hafi einnig flauta sem hann var með á bakpoka sínum skipt sköpum.

Telur þú að það hafi skipt miklu máli?

„Já það gerði það, því það dó á símanum hans rétt áður en við komum að honum. Ekki spurning það hjálpar mikið þegar skyggni er svona lítið.“