Stúdentaráð fagnar

„Við fögnum þessu, það er fyrst og fremst ótrúlega gott að það sé verið að eyða þessari óvissu,“ segir María Rut Kristinsdóttir, formaður Stúdentaráðs um ákvörðun Illuga Gunnarssonar menntamálaráðherra og LÍN að áfrýja ekki dómi Héraðsdóms Reykjavíkur í máli námsmanna gegn LÍN.

„Við erum búin að vinna að þessu í allt sumar og nú er kominn algjör lokapunktur á þetta,“ segir hún.

María Rut segir að einhverjir hafi ákveðið að fara ekki í nám í vetur vegna þessarar óvissu sem hafi ríkt um framfærslu og mjög margir voru tvístígandi. Hún bendir á þrátt fyrir að endurskráningu í námskeið hafi lokið í gær, hafi þau fengið vilyrði fyrir því að að það verði hægt að breyta skráningu eitthvað áfram.

Skólin muni sýna þessum aðstæðum skilning, þeir sem hafa til dæmis skráð sig í aukaáfanga til að ná upp nógu mikið af einingum til þess að fá lán, geta endurskoðað sína skráningu.

Að sögn Maríu Rutar koma alltaf þau rök fyrir því að gera þessar auknu kröfur um námsárangur stúdenta til þess að fá lán að svipaðar kröfur séu gerðar annars staðar.

María Rut segir að sú staðhæfing eigi ekki við rök að styðjast.  Þau hafi fengið sendar ályktanir frá öllum stúdentafélögunum á Norðurlöndunum þar sem þetta er hrakið.

Hún nefndir sem dæmi að í Noregi fái þeir nemendur sem klára 75 prósent eða 22 einingar á önn eða meira, fái styrk. Þeir sem klára á milli 15 og 22 einingar á önn fái hins vegar lán. Þannig að þar felist umbun í því að vera í fullu námi, en nemendur fái alltaf framfærslu.