Auka stærðfræðikunnáttu í gegnum leik

Helen Símonardóttir, kennari við Laugarnesskóla, fékk styrk fyrir verkefnið Foreldrar bregða á leik í stærðfræði, frá Verkefna- og námsstyrkjasjóði Kennarasambands Íslands síðasta vetur. Verkefnið hlaut hvatningarverðlaun skóla- og frístundasviðs í vor. „Í þessu verkefni set ég fram nokkur spil sem foreldrar geta spilað við börnin sín og notuð eru tæki og tól sem oft eru til á heimilum, spilastokkar og teningar, og einföld spil til að styðja og styrkja stærðfræðikunnáttu barnanna,“ segir Helen.

Hún hefur sinnt sérkennslu í stærðfræði og upphaflega var verkefnið aðeins ætlað börnum með slíkar þarfir en áhuginn reyndist mikill. „Þetta getur nýst öllum börnum á yngri stigum grunnskólans og eldri börnum sem eiga við mikla stærðfræðierfiðleika að stríða.“

Í verkefninu spiluðu foreldrar spil vikunnar með barni sínu í minnst 15 mínútur á dag, fimm daga vikunnar, en þótt því sé formlega lokið eru myndböndin, þar sem leikirnir eru útskýrðir, aðgengileg öllum á heimasíðu Lauganesskóla.

Sonur Helenar tók þátt í verkefninu og lék í myndböndunum með móður sinni. Í meðfylgjandi frétt sýna þau hvernig einn leikjannna gengur fyrir sig.