Hinsegin kórinn ekki með á styrktartónleikum "Þú getur“

Hinseginn kórinn birti í dag yfirlýsingu á Facebook þar sem fram kemur að kórinn muni ekki koma frá á styrktartónleikum „Þú getur“ sem fram fara í Hörpu í kvöld. Í yfirlýsingunni segir að kórinn tilkynni með miklum trega að hann muni ekki koma fram á tónleikunum eins og auglýst hafði verið.

Í færslunni segir jafnframt að ástæður fyrir því að kórinn komi ekki fram sé sú að forsvarsmenn styrktarsjóðsins hafi sett kórinn út í kuldann með heimatilbúnum rökum og að eftir sitji kórinn með sárt ennið.

Gunnlaugur Bragi Björnsson, formaður kórsins, sagði í samtali við Vísi að kórinn vissi ekki ennþá ástæður þess að hann sé ekki á dagskrá.

„Við erum ennþá auglýst í dagskrá tónleikanna en eigum ekki að koma fram. Við heyrðum í raun fyrst af þessu í útvarpinu á Rás2 fyrir rúmri viku en þá voru forsvarsmenn tónleikanna í viðtali og gáfu í skyn að kórinn yrði ekki með. þegar við könnuðum málið betur voru okkur gefnar þær ástæður að illa hafi gengið að ná í kórinn. Í staðinn fyrir að ræða við okku var kórnum í raun ýtt út,“ segir Gunnlaugur.

Markmið styrktarsjóðsins eru að standa við bakið á þeim sem hafa orðið fyrir áföllum eða átt við geðræn vandamál að stríða, auk þess að efla þjónustu við geðsjúka og draga úr fordómum gegn geðsjúkdómum. Gunnlaugur Bragi segir markmið yfirlýsingarinnar ekki að setja neikvæðan stimpil á söfnunina.

„Við viljum ekki vera með leiðindi við styrktarsjóð sem styður gott og verðugt málefni. Þetta er málefni sem við vildum leggja lið en fengum í raun ekki tækifæri til. Við vonum auðvitað að söfnunin gangi vel og að gestir skemmti sér vel.“

Ragnheiður Guðfinna Guðnadóttir er framkvæmdastjóri „Þú getur“ og hefur yfirumsjón með styrktartónleikunum. Hún segir málið eiga sér eðlilegar skýringar.

„Ég fagnaði komu kórsins mjög enda er hann merkilegur á alla vegu. Við erum að vinna að faglegri dagskrá þar sem mikilvægt er að svör komi ekki á síðustu stundu. Okkar tengiliðir byrjuðu að vinna að tilkomu kórsins í dagskránni fyrir einungis þremur vikum og þegar svör bárust ekki um hvenær kórinn kæmist í hljóðprufu og fleira þá var sú ákvörðun tekin að hafa kórinn ekki með í dagskránni,“ segir Ragnheiður.

Hún segir ómálefnalegar ástæður alls ekki hafa búið að baki ákvörðuninni.

„Við hefðum að sjálfsögðu viljað hafa kórinn með en því miður gekk það ekki í þetta skipti. Við bjóðum þau velkominn í dagskrá okkar á komandi árum,“ segir Ragnheiður.

Eins og áður segir eru tónleikarnir í Hörpu klukkan átta í kvöld þar sem fjölmargir tónlistarmenn munu leggja málefninu lið.

Post by Hinsegin kórinn - Reykjavík Queer Choir.