Veðrið færist í aukana

Útköllum björgunarsveita hefur fjölgað eftir því sem liðið hefur á daginn og veðrið sem nú gengur yfir landið færst í aukana.

Frá því klukkan 15:00 hafa sveitir verið kallaðar út vegna foks á þakplötum í Vestmannaeyjum, Hornafirði, Laugarvatni, Mýrdal, Hafnarfirði, Eyjafjallahreppi og Hveragerði auk þess sem í Bolungarvík er stórt gróðurhús að fjúka.

Fastir bílar hafa verið sóttir á Hrafnseyrarheiði, á Kaldadal, Kjalveg og Breiðdalsheiði þar sem sjö manns sitja fastir, þar af tvö börn.

Björgunarsveitir frá Djúpavogi og Breiðdalsvík eru nú á leið til aðstoðar fólkinu.

Einnig barst tilkynning um að bíll hafi farið útaf veginum í Vatnsskarði og eru björgunarsveitir á leið þangað. Þrír voru í bílnum og sluppu þeir með skrekkinn.

Í tilkynningu frá Vegagerðinni segir að Suðaustanlands, frá Hornafirði austur í Berufjörð verða áfram hættulegar hviður niður af bröttum fjöllum, allt að 50-60m/s alveg fram á nótt suðaustanlands frá Hornafirði austur í Berfjörð. Annars allt að 30-40 m/s sunnan undir Vatnajökli og við Lómagnúp og undir Eyjafjöllum. 

Ekki er útlit fyrir að taki að lægja á þessum slóðum fyrr en þegar vel er komið fram á morgundaginn.  Þá er einnig reiknað með hviðum á Kjalarnesi og á sunnanverðu Snæfellsnesi fram á nóttina. 



Á fjallvegum norðan- og norðaustanlands verður takmarkað skyggni í hríðarveðri allt til morguns.  Á Norðurlandi frá Skagafirði og austur úr ofan 200 metra hæðar og austanlands ofan 400-500 m.  Í kvöld gerir einnig krapa og hálku á Holtavörðuheiði.

Á Vestfjörðum er þungfært og óveður á Hrafnseyrarheiði en krap á Dynjandisheiði Hálfán og Kleifaheiði en hálkublettir á Mikladal. Hálkublettir eru svo á Steingrímsfjarðarheiði en snjóþekja og éljagangur á Þroskafjarðarheiði.

Norðanlands er krapi og éljagangur er á Vatnsskarði, Öxnadalsheiði og Víkurskarði og einnig  hálka og éljagangur á Mývatnsöræfum.  Þá er hálka á Möðrudalsöræfum og Vopnafjarðarheiði þar sem einnig er skafrenningur eða snjókoma.



Austanlands er svo hálka og skafrenningur á Fjarðarheiði en krapasnjór er Fagradal og Vatnsskarði eystra. Á Öxi er þæfingsfærð og óveður. Ófært er í Hamarsfirði vegna óveðurs. Einnig er ófært  á Hellisheiði eystri.



Á Suðausturlandi er ófært milli Kirkjubæjarklaustur og Freysness vegna óveðurs.



Á hálendisvegum má svo búast við krapa eða snjóþekju ásamt éljagangi og slæmum veðurskilyrðum.