Pressa III tilnefnd til Evrópsku sjónvarpsverðlaunanna

Pressa III er tilnefnd til Evrópsku sjónvarpsverðlaunanna sem besta evrópska dramaserían. Þetta er í fyrsta skipti sem íslensk sjónvarpssería er tilnefnd til þessara virtu verðlauna.

Prix Europa verðlaunahátíðin hefur verið haldin hátíðleg árlega frá árinu 1987 og verðlaunar það besta í ljósvakamiðlum Evrópu.

Í ár bárust dómnefnd Prix Europa rúmlega 670 innsendingar frá 35 löndum í Evrópu. Það er því mikill heiður að Pressa III hafi hlotið tilnefningu að sögn Kjartans Þórs Þórðarsonar, forstjóra Sagafilm.

„Tilnefning sem þessi hefur gríðarlega mikla þýðingu, ekki bara fyrir Sagafilm heldur fyrir alla framleiðslu á leiknu íslensku sjónvarpsefni. Þetta sýnir að íslenskt leikið sjónvarpsefni á vel upp á pallborðið í hinum stóra heimi og eru framleiðslugæðin á pari við það sem gengur og gerist í löndunum sem við berum okkur saman við,” segir Kjartan.

Pressa III var framleidd af Sagafilm og frumsýnd á Stöð 2 haustið 2012. Seríunni var leikstýrt af Óskari Jónassyni sem skrifaði jafnframt handritið ásamt Jóhanni Ævari Grímssyni, Margréti Örnólfsdóttur og Sigurjóni Kjartanssyni.