Neyðarástand á leigumarkaði

Árni Páll Árnason formaður Samfylkingarinnar segir að neyðarástand ríki á húsaleigumarkaði. Hann vill að ríkið bregðist við þessu með því að fella niður fjármagnstekjuskatt á leigutekjur og auka framboð leiguhúsnæðis.

Húsaleiguverð á höfuðborgarsvæðinu hækkaði um sjö og hálft prósent á fyrstu átta mánuðum þessa árs samkvæmt tölum frá Þjóðskrá. Algengt verð á fermetra er nú í kringum 2.000 krónur.

Eygló Harðardóttir, félagsmálaráðherra, hefur lýst því yfir að hún vilji skoða hvort hægt sé að fá verkalýðsfélögin til að koma að uppbyggingu íbúðarhúsnæðis og auka þannig framboð á leigumarkaði. Þetta kom fram í máli ráðherra í umræðu um leigumarkaðinn á Alþingi í síðustu viku.

Þingflokkur Samfylkingarinnar hefur lagt fram þingsályktunartillögu þar sem lagt er til að fjármangstekjuskattur á tekjur vegna útleigu einnar íbúðar verði felldur niður og að ríkið kalli eftir samstarfi við sveitarfélög til að auka framboð á markaði.

Árni Páll Árnason, formaður Samfylkingarinnar, segir nauðsynlegt að bregðast við því neyðarástandi sem nú ríkir á leigumarkaði. „Við sjáum í fréttum að fólk er látið hírast í skrifstofu- eða atvinnuhúsnæði við óboðlegar aðstæður. Þetta segir okkar að það ríkir neyðarástand á þessum markaði. Það er líka þannig að venjulegt vinnandi fólk sem hefur ágætis greiðslugetu fær ekki íbúðir. Það segir meira en mörg orð,“ segir Árni.

Árni segir að markmiðið með því að leyfa einstaklingum að leigja út eina íbúð skattfrjálst sé að auka framboð á markaði og einnig ívilna þeim sem leigja út íbúðir til búsetu. Í dag sé staðan þannig að stór hluti leiguíbúða sé einungis leigður ferðamönnum.

„Síðan viljum við að ríkið komi ásamt sveitarfélögunum að uppbyggingu leiguíbúða. Sveitarfélögin eru að borga núna hátt í 2 milljarða í almennar húsaleigubætur og við viljum að ríkið taki þann reikning yfir og sveitarfélögin nýti það svigrúm sem það skapar til þess að styrkja leigufélög sem geta þá byggt upp leiguhúsnæði.  Svo þarf að einfalda regluverkið sem gildir um byggingu leiguíbúða og endurskoða byggingareglugerður í því skyni,“ segir Árni.