Konan ákærð fyrir að hrækja á lögreglumanninn

Ríkissaksóknari hefur gefið út ákæru á hendur konu sem var handtekin á Laugavegi í júlí. Þetta kemur fram á mbl.is.

Þar segir að konan sé ákærð fyrir brot gegn valdstjórninni en hún á meðal annars að hafa hrækt á lögreglumann sem handtók hana í kjölfarið. Ákæran hefur enn ekki verið birt.

Eins og fram kom á Vísi fyrir helgi var lögreglumaðurinn ákærður fyrir líkamsárás og brot í opinberu starfi.

Atvikið náðist á myndband sem hefur vakið mikla athygli. Þar sést konan standa fyrir framan lögreglubíl á miðjum Laugavegi. Því næst gengur hún í átt að bílnum og er greinilegt að lögreglumanninum, sem er undir stýri, hugnast illa framganga hennar. Lögreglumaðurinn stuggar síðan við konunni með bílhurðinni.