„Ef ekkert verður gert förum við í greiðsluþrot“

Greiðsluþrot blasir við Eyþingi, Sambandi sveitafélaga í Eyjafirði og Þingeyjarsýslu, vegna halla á rekstri Strætó á Norður og Norðausturlandi. Sveitafélögin hafa séð um almenningsamgöngur á svæðinu síðan í fyrra. Formaður Eyþings segir málið alvarlegt.

Í fyrra setti ríkið inn í vegaáætlun að færa almenningssamgöngur frá vegagerð til sveitafélaga og hafa þau séð um reksturinn í rúmlega ár. Geir segir að snemma á árinu hafi komið í ljós að það stefndi í halla, en að menn hafi bundið vonir við að reksturinn tæki við sér yfir sumartímann. Nú er hins vegar ljóst að mikill halli er á rekstrinum.

Geir Kristinn Aðalsteinsson, formaður Eyþings, segir stöðuna grafalvarlega.

„Við höfum verið að ganga á sjóði Eyþings til þess að geta staðið við greiðslur. Þetta er verkefni sem við tókum við frá ríkinu í fyrra og að  okkar mati ekki eðlilegt að sveitafélögin þurfi að standa undir kostnaði þegar verkefni eru tekin yfir frá ríkinu. Ef ekkert verður að gert förum við í greiðsluþrot," segir Geir.

Hann segir að sveitafélögin þurfi að greiða rútuverktakanum sem sér um keyrsluna 4 milljónir króna á miðvikudag næstu viku, og fyrir því séu ekki til peningar. Fundað verður með þingmönnum kjördæmisins og innanríkisráðherra um málið á þriðjudag.

„Hvort ábyrgðin lendir á sveitafélögunum eða annarstaðar er lögfræðilegt úrlausnarefni sem vonandi þarf ekki að koma til þess að reyni á. Við vonumst til þess að við náum að landa þessu máli með ráðherra og þingmönnum. Ég er jákvæður á að það séu allir að vilja gerðir til að koma þessu máli í höfn. Verkefnið er gott en það þarf bara að vera rétt gefið í upphafi, það er svona lykilpunkturinn í málinu," segir hann.