Ótal brúðkaup á deginum 7-9-13: "Þetta er mjög spennandi"

Ótal brúðhjón kusu daginn í dag til að ganga í hjónaband og víða þurftu prestar að vísa fólki frá. „Svo breyttu nú einhverjir áætlunum sínum; ein brúðhjónin ákváðu t.d. aðeins að bíða með þetta, ætla að kaupa hús og gifta sig síðar,“ segir Vigfús Þór Árnason, sóknarprestur í Grafarvogskirkju.

Tölurnar sjö níu og þrettán eru sérstaklega magnaðar í þjóðtrúnni og þrír er talin einhver mesta happatala sem til er. Svö eru tölurnar í dagsetningunni þrjár, og þrisvar sinnum þrír eru níu, svo sú tala er enn magnaðri. „Sjö kemur held ég 300 sinnum fyrir í Biblíunni og svo er það þrenningin, faðir sonur og heilagur andi,“ segir Vigfús.

Það stóð ýmislegt skemmtilegt til í brúðkaupum dagsins. „Í einni athöfninni kem ég hérna inn og þá koma nokkrir vinir syngjandi inn og ég og brúðguminn segjum, nei þetta á ekki að vera hér , þetta á að vera í veislunni,“ segir hann hlæjandi.

Við fengum að fylgjast með æfingu fyrir brúðkaup þeirra Sigurðar Pálssonar og Erlu Þorsteinsdóttur í gær eins og sjá má í meðfylgjandi frétt.

Af hverju völduð þið þennan dag?

„Þetta er bara dagsetning sem gott er að muna,“ segir Sigurður.

Þannig að þið eruð ekki hjátrúarfull? „Nei, ég læt það vera,“ svarar Erla.

Þau vissu ekkert um dagskrána í eigin brúðkaupi. „Vinkona mín er veislustjóri og ég hef ekki fengið neinar upplýsingar um hvað verður gert í þessu brúðkaupi. Ég á bara að mæta,“ segir Erla hlæjandi.

Þið hlakkið væntanlega til?

„Já, þetta er mjög spennandi,“ segja þau að lokum.

Við óskum þeim Sigurði og Erlu og öllum brúðhjónum dagsins auðvitað innilega til hamingju.