Ráðherra segir raforkumál fá of litla athygli

Ragnheiður Elín Árnadóttir, iðnaðar- og viðskiptaráðherra, fagnar nýrri skýrslu sem unnin var fyrir Landsnet um stöðu raforkukerfisins hér á landi. Helsta miðurstaða skýrslunnar er að ef flutningskerfið verði ekki eflt getur kostnaður þjóðfélagsins naumið á bilinu 36-144 milljörðum fram til ársins 2040.

„Þessi skýrsla er gott innlegg í þá vinnu sem á sér stað hér í ráðuneytinu. Þessi málaflokkur hefur fengið of litla athygli og deilur hafa yfirtekið umræðuna. Umræða um orkuöryggi og þjóðhagslegt mikilvægi hefur setið á hakanum,“ segir Ragnheiður Elín í samtali við Vísi.

„Við þurfum að hugsa þetta út frá því í hvernig samfélagi við viljum búa í. Viljum við að það sé hægt að vera í atvinnuuppbyggingu um allt land? Viljum við geta tryggt raforkuöryggi til framtíðar? Svarið mitt er já. Við þurfum að skoða hvað þurfi að gera til að svo megi vera. Það eru spurningar sem vakna líkt og þær hvort við ætlum að leggja línur í jörð og að leggja línu í gegnum hálendið. Þetta eru hlutir sem við þurfum að meta í þjóðhagslegu samhengi og þess vegna er mjög gott að fá þessa skýrslu inn í umræðuna.“

Nauðsynlegt að bæta kerfið

Ragnheiður Elín ætlar að leggja mikla áherslu á orkumál á komandi þingi og segist vera opin fyrir þeirri hugmynd að lagðar verði raflínur í gegnum hálendið til að sameina raforkukerfin á milli landshluta.

„Það þarf að bæta kerfið að því leytinu til að við séum með heilt raforkukerfi. Við lentum í því á síðasta ári að það þurfti að grípa til aðgerða á Norðausturlandi og draga úr straumi á verksmiðjur vegna skorst á orku. Á sama tíma var nægur straumur á kerfinu fyrir sunnan. Við þurfum því að spyrja okkur hvort við bætum kerfið með því að leggja línu í gegnum hálendið eða hvort það sé mögulegt með öðrum hætti.“