Álagið á kennara eykst

Nýjar tölur Hagstofunnar sem sýna að kennurum, leiðbeinendum og öðru starfsfólki grunnskóla fer fækkandi kemur Ólafi Loftssyni, formanni Félags grunnskólakennara ekki á óvart.

Á vef Hagstofunnar kemur fram að síðasta haust voru 7.279 starfsmenn í 6.550 stöðugildum í grunnskólum á Íslandi. Þar af voru 4.784 starfsmenn við kennslu í 4.534 stöðugildum. Starfsfólki fækkaði fjórða árið í röð. Starfsmönnum við kennslu, þ.e. skólastjórnendum, deildarstjórum og kennurum fjölgaði um 41, sem er fjölgun um 0,9%, en stöðugildum þeirra fækkaði um 25. Öðrum starfsmönnum grunnskólans en starfsfólki við kennslu fækkaði um 99 og um 107 stöðugildi. Frá haustinu 2008 hefur öðrum starfsmönnum en þeim sem koma beint að kennslu barna fækkað um 288 manns (10,4%) og stöðugildum þeirra fækkað frá sama tíma um 301 (13,0%).

„Þetta þýðir bara mikið álag og menn geta ekki sinnt öllu," segir Ólafur í samtali við Vísi. Þetta þýði einfaldlega að menn vinni allt of mikið, oft án þess að fá greitt fyrir það. „Við vitum það að á meðan nemendum er að fækka hverfandi að þá þýðir þetta bara það að það eru miklu færri að sinna þessum störfum," segir hann.

Hann bendir líka á að verkefnum sé alltaf að fjölga. Grunnskólanemum með erlent ríkisfang og erlent móðurmál fari fjölgandi og skóli án aðgreiningar sé í fullum gangi. Þegar fólki fækki sé því vinnan meiri fyrir þá sem eftir eru í störfunum, með tilheyrandi álagi.