Mikið vatn í Skaftárkötlum

Töluvert magn vatns hefur safnast fyrir í Skaftárkötlum, sem eru í vesturhluta Vatnajökuls. Þetta sýna myndir og myndskeið sem Jón Grétar Sigurðsson, flugmaður hjá Atlantsflugi, tók þegar hann flaug þar yfir.

Bergur Einarsson er jarðeðlisfræðingur hjá Veðurstofunni segir óvenjulangt um liðið frá síðasta hlaupi úr austari katlinum.

„Það kemur að meðaltali hlaup á tveggja ára fresti úr kötlunum, en það eru komin þrjú ár núna, svo menn eiga von á hlaupi á næstu vikum. Við fylgjumst grannt með stöðunni og það eru sérstakir mælar sem senda viðvörunarboð ef það verða einhverjar breytingar eða hlaupórói myndast undan jöklunum,“ segir hann.

Bergur segir vatnið sem sést á myndunum ekki vera vatnið sem kemur fram í hlaupunum sjálfum. „Þetta er bara yfirborðsvatn sem safnast þarna saman. Raunverulega hlaupvatnið myndast þegar bráðnun verður við botn vegna jarðhita. Svo safnast það saman í óstöðugt lón við jökulbotninn. Það er mun meira vatn en sést þarna í þessari litlu tjörn á yfirborðinu.“