Ómar með gagnsókn; Dynkur fái vatnið aftur

Nýjar hugmyndir um að virkja orku efri Þjórsár með Norðlingaölduveitu mæta harðri andstöðu náttúruverndarsamtaka sem og oddvita Skeiða- og Gnúpverjahrepps. Ómar Ragnarsson vill að málamiðlun nái í hina áttina; að fossinn Dynkur fái aftur vatnið sem þegar er búið að taka af honum.

Ragnheiður Elín Árnadóttir iðnaðarráðherra kvaðst á Stöð 2 í gær, eftir skoðunarferð um Norðlingaöldu, sannfærð um að ná mætti sátt um málið. Viðbrögðin í dag benda til annars og Ómar Ragnarsson kallar svæðið heilög vé.

„Ef það verður sátt um þetta þá bara heldur það áfram og tekur Dettifoss næst með helmingsvirkjun og hann verður látinn renna á helmingsafli einhvern hluta úr sumrinu, og svo framvegis," segir Ómar og líkir þessu við dæmisöguna um sáttina sem uglan náði um ostbitann. „Þar sem hún byrjar með stóran ostbita, skipti alltaf vitlaust, það var aldrei sátt, þangað til ostbitinn var búinn og hún var búin að éta hann allan sjálf."

Björgvin Skafti Bjarnason, oddviti Skeiða- og Gnúpverjahrepps, leggst einnig gegn hugmyndunum og segir allt eins hægt að virkja Gullfoss. Oddvitinn segir andstöðu hreppsins byggja á þeim áhrifum sem veitan hefði á náttúrufar svæðisins og á fossaröðina í efri Þjórsá. Þetta séu stórmerkilegir fossar sem skerðist með Norðlingaölduveitu.

„Svo er þetta líka samkomulag þjóðarinnar um að Norðlingaölduveita verði ekki virkjuð," segir Björgvin.

En hversvegna vill Landsvirkjun halda í þennan orkukost, sem fyrri ríkisstjórn var búinn að hafna og setja í verndarflokk?

Hörður Arnason forstjóri segir þetta mjög hagkvæman orkukost þar sem ekki þurfi að byggja nýjar virkjanir heldur nýtist vatnið í fjórum virkjunum í Tungnaá. „Og svo teljum við að það sé hægt að finna útfærslu sem hafi mjög lítil umhverfisáhrif," segir Hörður.  

Forstjóri Landsvirkjunar segir engan ágreining um að Þjórsárver beri að vernda að fullu en fyrirtækið sé að leita leiða til að tryggja að veitan hafi engin áhrif á Eyvafen og að minnka áhrifin á fossana.

„Áhrifin verða að sjálfsögðu einhver á fossaröðina. En aðgengi að þessum fossum er mjög takmarkað á sumrin og við teljum að það sé mögulegt að finna lausn þannig að á þeim tíma, sem ferðamenn komast að fossunum, þá sé umtalsvert vatn á fossunum. En það er óhjákvæmilegt að sjálfsögðu að veitan hafi áhrif á fossana."

Ómar er sennilega sá fréttamaður sem fyrstur sýndi landsmönnum fossana í efri Þjórsá en þar eru Dynkur og Gljúfurleitarfoss hæstir. Rennsli þeirra minnkaði um 40 prósent með gerð Kvíslaveitu fyrir 30 árum.

„Dynkur er flottasti stórfoss landsins, ef hann er á fullu afli," segir Ómar og spyr hvort málamiðlun megi ekki ná í hina áttina; ekki að virkja ána meira heldur minna. „Að taka að minnsta kosti part af Kvíslaveitu, eða jafnvel alla, og láta Dynk njóta sín allt árið, eins og hann á að gera."