„Ekki að brjóta lög“

Sjávarútvegsráðherra segist ekki vera að brjóta lög með fyrirhuguðum breytingum sínum á úthlutun aflaheimilda í úthafsrækju. Hann segir ráðuneytið vera að reyna að höggva á hnút sem fyrrverandi ríkisstjórn bjó til.

Sigurður Ingi Jóhannsson sjávarútvegsráðherra boðaði að loknum ríkisstjórnarfundi á föstudag að ekki yrðu gefnar út aflaheimildir á skip vegna úthafsrækjuveiða á næsta fiskveiðiári sem hefst um mánaðamótin, og fetar þar í fótspor fyrri sjávarútvegsráðherra frá árinu 2010. Veiðarnar verði frjálsar en gefin út heildarkvóti. Adolf Guðmundssin, formaður LÍÚ, sagði í hádegisfréttum Bylgjunnar að þetta væri lögbrot. „Við teljum að þessar ákvarðanir hans um að vera með frjálsar veiðar frá og með næsta fiskveiðiári seu ólögmætar og við höfum talið það síðan þær voru gefnar frjálsar,“ segir hann.

Þá boðar sjávarútvegsráðherra frumvarp á haustþingi um breytingar á reglum um úthlutun aflaheimilda í úthafsrækju. Þar muni aflareynsla þeirra sem höfðu úthlutaðar heimildir á árunum 1988 til 2010 vega 70 prósent en þriggja ára veiðireynsla annarra útgerða frá árinu 2010 vega 30 prósent. „Og við teljum þá ráðstöfun núna hjá Sigurði að fara að boða skiptingu og endurúthlutun á grundvelli nýrrar veiðireynslu að það standist heldur ekki lög,“ segir Adolf.

Sjávarútvegsráðherra segir ráðuneytið hafa leitað eftir lögfræðiálitum til að skýra stöðuna og er hann ósammála því að verið sé að brjóta lög með þessari ráðstöfun. „Við teljum að svo sé ekki. Við teljum að við séum að reyna að höggva á hnút sem fyrrverandi ríkisstjórn bjó til án þess að hafa gefið út nokkrar vísbendingar um hvernig skyldi fara með annars vegar réttindi þeirra sem áður veiddu né heldur réttindi þeirra sem hafa veitt síðastliðin þrjú ár,“ segir Sigurður.