Engin gengisfelling á hundraðkallinum

Þeir sem fylgjast með knattspyrnu þekkja það vel að í þeim harðneskjulega heima er farið að slá í menn þegar þeir nálgast þriðja áratuginn. Ef meiðsli bætast síðan ofan á er næstum öll nótt úti. En því er öðruvísi háttað í langhlaupunum og sérstaklega þegar Ágúst nokkur Kvaran á í hlut.

Ágúst er sextíu og eins ár og var að keppa um síðustu helgi í 81 kílómetra fjallahlaupi. Svokölluðu Hengilshlaupi. Lenti hann í þriðja sæti en mest þykir honum um að getað hlaupið að krafti á ný en hann er nýlega risinn upp úr erfiðum og langvarandi meiðslum.

Ágúst er fyrsti hundraðkallinn en eins og hlaupagikkir þekkja eru þeir kallaðir hundraðkallar sem hlaupið hafa hundrað kílómetra hlaup. Ágúst reið á vaðið árið 1999 en síðan þá hafa fimmtíu og einn maður náð slíkum áfanga. Ekki eru það einungis karlmenn í hundraðkallafélaginu því þeirra á meðal er meðal annarra kvenna Elísabet Margeirsdóttir en hún vann Hengilshlaupið um síðustu helgi.

En Ágúst ætlar ekki að setjast í helgan stein eftir 81 kílómetrana. „Nú stefni ég á að hlaupa hundrað mílna hlaup á Grikklandi í haust," segir hann. „Það eru rúmlega hundrað og sextíu kílómetrar. Þetta er mjög erfið keppni því hlaupið verður um fjalllendi um grýttar slóðir. En ég er nú nokkuð viss um að ég komist þetta en það er ekki nóg, menn verða að klára hlaupið innan fjörutíu og tveggja klukkustunda."

Mörgum þætti eflaust nóg um því Ágúst fótbrotnaði í hjólaslysi í Sviss á sextugsafmæli sínu fyrir einu ári. Þar að auki hefur hann rifið liðþófa á báðum hnjám. „Jú, maður var stundum hálf smeykur um að þetta væri búið en nú kláraði ég þetta hlaup um helgina og þau héldu, ég fann ekki fyrir neinum óþægindum," segir hann.

Þeir sem vilja slá Ágústi við hafa aldeilis verk að vinna því afreksskráin en löng og fær menn á besta aldri og í fantaformi til að kikna. Til dæmis fór hann árið 2009 með bak- og kviðpokann sinn hlaupandi Kjalveg á fjórum dögum sem eru um 175 kílómetrar og sama ár hljóp hann 200 kílómetra eyðimerkurhlaup í Sahara. Ferðalangar víða um land skula því ekki láta sig bregða ef þeir sjá hundraðkall að hita upp fyrir Grikklandshlaupið mikla.