Sagðist hafa ýtt á vitlausan takka

Bílstjórinn sem tæmdi úr kamri rútu sinnar á Selfossi er svissneskur að sögn vitnis. Hann ber því við að hafa ýtt á vitlausan takka.

Vísir greindi frá málinu í gær og var umsjónarmanni gámasvæðisins, sem sá rútuna tilsýndar við eitthvað sem hann taldi æfingaakstur, brugðið þá er hann fór til að kanna vegsummerki eftir ábendingu.

Vegfarandi sem Vísir heyrði í nú fyrir stundu stóð hins vegar bílstjórann að verki og skammað hann fyrir tiltækið. Vegfarandinn segir að bílstjórinn svissneski hafa borið því við að hafa ýtt á vitlausan takka þá er hann losaði. Viðmælandi Bylgjunnar telur þessa afsökun síður en svo trúverðuga -- í raun fráleita.

Lögreglunni á Selfossi barst þetta tiltæki ekki til eyrna fyrr en daginn eftir að þetta gerðist og þá var rútan á bak og burt. Fjársektir liggja við broti sem þessu.