Komið að ögurstundu í deilu geislafræðinga

Formaður Félags geislafræðinga segir komið að ögurstundu í viðræðum þeirra við yfirstjórn Landsspítalans og ekki dugi að gefa loforð um leiðréttingu kjara þeirra í komandi kjarasamnngum. Tveir þriðju starfandi geislafræðinga ganga út af spítalnum eftir tólf klukkustundir náist ekki samningar.

Tíminn er að renna út varðandi lausn á deilu geislafræðinga og Landsspítalans, en uppsagnir um fjörtíu geislafræðinga taka gildi um miðnætti hafi ekki samist . Katrín Sigurðardóttir formaður Félags geislafræðinga segist bjartsýn að eðlisfari og hún héldi í vonina skömmu áður en hún fór inn á samningafund upp úr klukkan ellefu í morgun. Fréttastofan hefur heyrt að búið sé að bjóða geislafræðingum einhverja hækkun, er það rétt?

„Auðvitað er eitthvað inn í myndinni og hefur verið frá upphafi. En spurningin er hvað og hvernig. Það eru ákveðnir hlutir sem geislafræðingar hafa talað um og við erum að berjast við að koma til skila því sem fólki finnst vanta upp á svo það geti hugsað sér að starfa þarna áfram,“ segir Katrín.

Katrín segir kröfur geislafræðinga snúast um fleira en beinar launahækkanir og á sumum sviðum hafi verið komið til móts við þeirra kröfur, en ekki launaliðinn. Sjúkrahúsið telji sig ekki hafa leiðir til að koma til móts við heildarkröfurnar.

Kjarasamningur geislafræðinga eins og annarra opinberra starfsmanna rennur út um áramótin. Duga einhver loforð inn í þær viðræður til að leysa þann hnút sem málin eru í núna?

„Það er mjög erfitt með þessi loforð, því það er búið að lofa svo oft með alls konar bókunum sem er svo ekki staðið við. Af hvaða ástæðum sem það er. Þannig að það er mjög ósanfærandi í okkar eyrum,“ segir Katrín.

Það verði að leysa málið núna. Um fjörtíu geislafræðingar hætta störfum á miðnætti, eða tveir þriðju allra geislafræðinga á spítalanum, ef samningar takast ekki í dag. Það sé engan bilbug á geislafræðingum að finna.

„Nei, einstaklingarnir eru búnir að ákveða að þeir geti ekki lengur sætt sig við stöðuna og ég heyri ekki annað á fólki en það sé algerlega búið að fá nóg. Og það er ekkert sem maður getur gert í því annað en reyna að finna leiðir til að afstaða þess breytist,“  segir Katrín Sigurðardóttir formaður Félags geislafræðinga.