24 milljónir ökutækja á 15 árum

Tuttugu og fjórar milljónir ökutækja hafa ekið í gegnum Hvalfjarðargöngin á þeim fimmtán árum sem þau hafa verið opin. Til stendur að afhenda ríkinu göngin í september árið 2018.

Þann 11. júlí síðastliðinn voru 15 ár frá því að Davíð Oddsson þáverandi forsætisráðherra klippti á borða sunnan megin í Hvalfirði og opnaði göngin formlega. Síðan þá hafa landsmenn notið þess að sleppa við tæplega hundrað kílómetra langan spotta sem Hvalfjörðurinn er.

Daginn eftir fimmtán ára afmælið, eða 12. júlí síðastliðinn, höfðu 24 milljónir ökutækja ekið um göngin. Það gerir rúmlega eina og hálfa milljón ökutækja á hverju ári.

Það vekur athygli að veggjaldið í dag, þúsund krónur fyrir stakan fólksbíl, er það sama og fyrir fimmtán árum síðan.

„Þetta hefur bara gengið vonum framar, göngin hafa sýnt sig og sannað að þau áttu fullan rétt á sér. Því er hægt að hægt að halda gjaldinu í sama farinu," segir Marinó Tryggvason, afgreiðslustjóri Spalar, sem sér um rekstur Hvalfjarðarganganna..

Þegar göngin voru opnuð árið 1998 var hægt að fá 13,3 lítra af bensíni fyrir þúsund kallinn, sem kostaði í göngin. Núna, árið 2013, er hægt að fá 3,9 lítra fyrir sömu upphæð.

Upphaflega átti veggjaldið að vera tengt vísitölu neysluverðs. En vegna mun meiri umferðar en gert var ráð fyrir, var gjaldið lækkað að raunvirði. Ef gjaldskráin hefði fylgt verðlagi, þá kostaði stök ferð í dag fyrir fólksbíl, 2.252 krónur í dag - en ekki 1000 þúsund krónur.

Spölur ehf er á áætlun að greiða síðustu afborgun af lánum í september árið 2018. Marinó segir að ríkinu verði þá afhent göngin, það sé því í verkahring yfirvalda að ákveða hvort gjaldtöku verði hætt.