Útvarpsgjald rukkað þótt útgáfan sé löngu hætt

Arnar Björnsson íþróttafréttamaður fékk símtal í morgun þess efnis að Víkurblaðið sf. á Húsavík skuldaði 96 þúsund krónur í útvarpsgjald, þrátt fyrir að starfsemi fyrirtækisins hefði verið löngu hætt.

„Þetta blað hætti að koma út sjö áum áður en nýju útvarpslögin tóku gildi árið 2007,“ segir Arnar, en hann stóð að útgáfu blaðsins ásamt tveimur öðrum frá árinu 1979 til aldamóta. Hann segir að á vefsíðu ríkisskattstjóra sjáist að virðisaukaskattsnúmerinu hafi verið lokað 31. desember 1999.

„Við vorum svo grænir og héldum að það hefði átt að duga. En nei, okkur láðist að slíta félaginu formlega og því er það ennþá tæknilega til staðar og virkt. Frá og með þessum lögum 2007 hef ég átt að greiða útvarpsgjald á hverju ári, en ég hef aldrei fengið neinar upplýsingar um að ég skuldaði neitt fyrr en nú.“

Arnar segir þetta dæmi um „bullskattlagningu“ sem hafi „ekkert með heilbrigða skynsemi að gera“, en að sögn hans voru embættismenn hjá ríkisskattstjóra afar ljúfir þegar hann hringdi vegna málsins.

„Samkvæmt því sem þeir sögðu þá eru einhver fordæmi, og einhverjir dómar hafa fallið í sambærilegum málum. Þau hafa öll verið sækjendum í óhag og ég sé því ekki annan kost í stöðunni en að greiða þetta. En að vera að rukka fyrirtæki sem er búið að vera dautt í þrettán ár, þar af sex eða sjö ár áður en þessi lög taka gildi, er auðvitað alveg galið.“