Fótbolti

Umfjöllun, viðtöl og myndir: Breiðablik - Sturm Graz 0-0

Eyþór Atli Einarsson á Kópavogsvelli skrifar
Mynd / ARnþór

Það var af mikilli elju sem heimamenn í Breiðabliki knúðu fram jafntefli í leik þeirra gegn Sturm Graz frá Austurríki í kvöld.  Leikurinn byrjaði nokkuð rólega en Blikar virtust ætla sér aðeins um of í upphafi og „nýtt“ leikskipulag þeirra virtist aðeins vera að vefjast fyrir mönnum.

Þeir voru þó fljótir að átta sig á hlutunum og voru mjög skipulagðir í sínum aðgerðum, meira en minna, það sem eftir lifði leiks.

Fyrsta færi leiksins fengu heimamenn þegar Sverrir Ingi Ingason skaut framhjá úr aukaspyrnu á fimmtu mínútu.

Gestirnir úr Sturm Graz voru mun meira með boltann og var þeirra hættulegastur uppi við mark Blika maður að nafni Marco Djuricin. Það var hann sem átti hættulegustu færin í fyrri hálfleik en Gunnleifur Gunnleifsson markvörður Blika var vel vakandi á verðinum.

Staðan í hálfleik 0-0 og Blikarnir voru mjög agaðir í sínum leik og gestirnir áttu mjög erfitt með að finna glufur á þéttum varnarleik þeirra.

Í síðari hálfleik var það sama uppi á teningnum. Blikarnir börðust eins og grenjandi ljón og gaman hefði verið að hafa mælitæki á mönnum eins og Kristni Jónssyni, Elfari Árna Aðalsteinssyni og Andra Rafni Yeoman í þessum leik. Menn hlupu um eins og híenur allan leikinn og mátti oft sjá framherjann Elfar Árna kominn niður í öftustu varnarlínu andandi ofan í hálsmálið á andstæðingum.

Lítið var um færi á báða bóga í síðari hálfleiknum eins og í þeim fyrri en Austurríkismenn áttu þó aðeins hættulegri sóknir. Kópavogspiltar voru þó nokkrum sinnum á góðri leið með að skapa sér virkilega góð færi en því miður var úrslitasendingin oftar en ekki slök.

Vinnan og skipulagið skilaði Blikum góðu jafntefli í kvöld og hefði verið skemmtilegt ef þeir hefðu komið inn eins og einu marki.

Hjá Sturm Graz var þeirra hættulegastur framherjinn Marco Djuricin en hann skapaði sér nokkur færi. Hann gerðist þó sekur um það að henda sér í jörðina eins og hann hafi verið skotinn einu sinni og uppskar gult spjald fyrir vikið. Liðið var þó ágætlega spilandi og verður leikurinn í Susturríki erfiður fyrir Breiðablik en möguleikarnir þó ágætir.

Erfitt er að taka einhverja leikmenn út sem stóðu sig betur en aðrir þar sem þetta var mjög góður leikur liðsheildarinnar hjá Blikum. Þó áður hafi verið nefndir til sögunnar nokkrir sem hlupu úr sér lungun þá voru aðrir leikmenn að gera slíkt hið sama og var ekki að sjá að möguleikar Blikanna séu litlir fyrir síðari leikinn ytra.


Ólafur Kristjánsson: Vildum sækja af hóflegri skynsemi

„Fyrstu tvær mínúturnar voru góðar en næstu þrettán vorum við að ströggla. Það helgaðist kannski af því að við gáfum ekki nægilega völdun og þegar það lagaðist þá fannst mér þetta ganga betur. Markmiðið var að halda hreinu og sjá hvað við fengjum marga mola til að setja á þá mark.“ sagði Ólafur Kristjánsson, þjálfar Breiðabliks, eftir leik sinna manna í Evrópudeildinni í kvöld.

„Við breyttum aðeins um leikstillingu og spiluðum 3-5-2 sem á köflum var 5-3-2. Það sem ég sá frá þeim úti spiluðu þeir mikið stuttum sendingum í gegnum miðjuna og við vildum ýta þeim út í vængina og mér fannst það takast ágælega. Þeir fóru lítið í gegnum miðjuna hjá okkur og þurftu þá að eiga við fyrirgjafir gegn þremur hafsentum inni í teignum. Varnarlega spilaðist þetta eins og ég var að vona en sóknarlega voru teikn á lofti að við kæmumst í gegnum þá.“ sagði Ólafur en hann þurfti ekki að segja mönnum að þeir þyrftu að leggja á sig fyrir þennan leik.

„Í keppnisíþróttum á ég sem þjálfari ekki að þurfa að segja mönnum að hlaupa og berjast. Þegar þú skráir þig í keppnisíþrótt skráir þú þig sjálfkrafa í það að þurfa að leggja á þig. Strákarnir börðust svo sannarlega hér í dag.“

Blikarnir stilltu liðinu upp á óhefðbundinn hátt miðað við aðra leiki sumarsins. Uppleggið var 3-5-2 í stað hefðbundins leikkerfis 4-3-3.

„Við spiluðum þetta í fyrra á móti KR í einum leik og nokkra leiki í lengjubikarnum á undirbúningstímabilinu til þess að undirbúa okkur fyrir svona leiki þar sem við þurftum að verjast aðeins breiðar og aftar en við erum vanir. Það gafst ekki mikill tími til þess fara í þetta í vikunni þar sem voru tvær æfingar en það er um vetur sem grunnurinn er lagður.“ sagði Óli.

Blikarnir náðu nokkrum álitlegum sóknum í upphafi síðari hálfleiks en aðspurður hvort hann hafi ekki viljað sjá sína menn sækja meira á þá á þeim tíma sagði þjálfarinn.

„Ef þú kíkir á leiki hjá íslenskum liðum í Evrópukeppni þá er það þegar menn fá þetta falska öryggi og komast framar á völlinn og æðislega gaman í stúkunni að liðin refsa. Við vildum því sækja af hóflegri skynsemi.

„Við erum lifandi í einvíginu. Þegar við spiluðum í Rosenborg síðast vorum við með 5-0 tap á bakinu og við vildum svo sannarlega ekki lenda í þeirri stöðu aftur. Það getur vel verið að ég haldi sama kerfi en ég veit ekkert hvað Austuríkismennirnir gera. Það væri jafnvel hægt að rugla þá í ríminu og breyta algjörlega um taktík.“

„Núna fer ég bara og fæ mér að borða og síðan er einbeiting komin á leik á sunnudaginn.“ sagði þjálfarinn geðþekki að lokum en næsti leikur Breiðabliks er gegn Þór í Pepsi-deildinni á sunnudaginn.

Kristinn Jónsson: Ísbað í dágóðan tíma eftir þennan leik

„Ég býst við því að maður verði í því að endurheimta krafta næstu daga. Maður þarf að borða vel og ætli það verði svo ekki ísbað í dágóðan tíma.“ sagði vinstri bakvörðu Breiðabliks, Kristinn Jónsson, eftir jafntefli gegn Sturm Graz í kvöld.

„Við vorum ekki að færa nægilega vel á kantana í byrjun en þegar það kom fannst mér þetta ganga alveg eins og fyrir var lagt.“

„Við vorum búnir að ákveða fyrir leikinn að halda skipulagi sama hvað á dyni og vona að við kæmumst í skyndisókn.“

„Í vetur vorum við með plan A og plan B og þetta var í raun plan B í dag og við gerðum það mjög vel.“

„Mér fannst þeir vera farnir að þyngjast í lokin alveg eins og við. Þannig að mér fannst munurinn ekki svo mikill.Ég held að það séu helmings líkur á að komast áfram. Ef við náum að skora úti þá erum við í þokkalega góðum málum.“

„Nú ýtum við þessari Evrópukeppni til hliðar og gírum okkur upp í leik á sunnudaginn gegn Þór sem við ætlum að vinna.“ sagði Kristinn Jónsson að lokum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.