Belenenses sendi fyrirspurn í Sverri Inga

Íslenskir knattspyrnumenn virðast vera vinsælir af portúgalska félaginu Belenenses því félagið hefur nú sent Breiðablik fyrirspurn vegna varnarmannsins Sverris Inga Ingasonar.

Vefsíðan 433.is sagði að Blikar hefðu fengið tilboð en Borghildur Sigurðardóttir, formaður knattspyrnudeildar Breiðabliks, segir við fótbolta.net að það sé rangt. Aðeins hafi komið óformleg fyrirspurn.

Sverrir Ingi hefur verið frábær í hjarta varnarinnar hjá Breiðblik á tímabilinu og var til að mynda valinn leikmaður umferðarinnar af Pepsi-mörkunum eftir 8. umferðina.

Liðið er einnig á eftir Helga Val Daníelssyni sem mun líklega semja við portúgalska félagið í vikunni.

Sverrir Ingi er tvítugur að aldri og tekið þátt í öllum leikjum Breiðabliks á tímabilinu. Leikmaðurinn er fyrirliði U-21 landsliðsins í knattspyrnu.